Kolektore berria eta saneamendu instalazioak eraikitzeko lanak hasi dituzte Oiartzun ibaiaren saneamendua hobetzeko. 2, 2 miloi euroko inbertsioa egingo dute horretarako Gipuzkoako Foru Aldundiak eta Añarbeko Urak Manokomunitateak.
Errenteriako kolektore berriaren lanak hasi dituzte.
Kolektore berria eta saneamendu instalazioak eraikitzeko lanak hasi dituzte Oiartzun ibaiaren saneamendua hobetzeko. 2, 2 miloi euroko inbertsioa egingo dute horretarako Gipuzkoako Foru Aldundiak eta Añarbeko Urak Manokomunitateak, eta gaur eman dituzte lanen gaineko xehetasunak Bernar Lemos Hirigintza zinegotziak, Maije Zelaia Añarbeko Uraken presidenteak eta Jose Ignacio Asensio Ingurumen eta Obra Hidraulikoen diputatuak Iztieta pasealekuan, obrak egingo dituzten gunean egin duten agerraldian.
Lanen bidez Iztieta eta Errenteriako ponpatze estazioak lotuko dituen 438 metro luze eta 1,2 metroko diametroa izango duen kolektore berria eraikiko dute. Azken horrek, Errenteriako saneamendu kolektore nagusiaren zati handi bat berritzea suposatuko du, Oiartzun ibaiaren ezkerraldetik pasatzen dena, zehazki. Errenteriako, Oiartzungo eta Lezoko zati bateko hondakin urak Pasaiako Badian dagoen intertzeptoreraino eramango ditu, hemendik Loiolako araztegira, eta handik itsasora.
Oiartzun ibaira hondakin solidoen isurtzea saihestuko dute kolektore berriak eta solidoen erretentziorako instalazio berriak, gainera, gaur egun sarearen ustiaketan dauden arazoak ere saihestu egingo direla esan du Zelaiak, “Iztietako ponpatze estazioan pilatzen diren hondakin urak gelditu gabe ponpatu beharrik ez da izango”. Ingurumenean zein urean hobekuntza nabarmenak izango dituela gaineratu du: “Errenteriako udal saneamendu sarearen, zein Añarberen titularitatekoa den goi sarearen funtzionamendu hidraulikoa hobetuko da; euria indartsu egiten duenean ibaira egiten diren isuriak murriztu egingo dira eta ez da inongo hondakin solidorik isuriko; Azkenik, Iztietako hondakin uren ponpatze estazioa ezabatuko denez, energia elektrikoaren kontsumoa gutxituko da. Pônpatze estazioaren lokala gainera udalari emango zaio berak erabilera publikoa egin dezan”.
Zulaketaren teknika
Lanekin ahalik eta kalte gutxien sortzen saiatuko direla esan du gainera Añarbeko Uraken presidenteak. izan ere zangarik ez dute egingo, zulaketaren teknika erabiliko dute. Putzu bertikal bat irekiko dute Amasa kalearen amaieran, Mataderoaren aurrean. Kolektore berriaren eraikuntzak zenbait aldaketa eragingo ditu udal saneamendu sarean Zelaiaren esanetan: “Amasa kaleko udal saneamendu kolektorearen konexioa egiteko 25 metro luze eta 400 milimetro zabaleko diametroa izango dituen kolektorea egingo dute, oraingoan bai, zangak irekiaz”.
Lanek urtebeteko iraupena izatea aurreikusi dute. Lemosek Iztietakoa obra handia izango dela nabarmenduta,
hobekuntzak ekarriko dituela auzoarentzat esan du eta eskerrak eman dizkie aldundiari eta Añarbeko Urei Amasa eta Astigarraga kaleetako saneamendua obraren barruan sartzeagatik, “auzoari hobekuntzak ekarriko dizkiolako”. Bizilagunei lanek ahalik eta eragozpen gutxien sortzea espero duela esan du zinegotziak, eta azken horiei, pazientzia eskatu die.
Gipuzkoako Foru Aldundiak eta Añarbeko Urak Mankomunitateak joan den ekainean sinatu zuten kolektore berria eraikitzeko
hitzarmena.
