Estalki berria saltoka inauguratu dute ikasleek

Heldu da eguna. Lezo Herri Eskolak badu estalkia. Atzerapenak izan dituzte lanak egiteko garaian, baina gaur inauguratu dute

Ikerne Zarate Gartziarena

Lezo

2017/10/27

Martiarena eta Aldabe zinta mozten.

Heldu da eguna. Lezo Herri Eskolak badu estalkia. Atzerapenak izan dituzte lanak egiteko garaian, baina gaur inauguratu dute udal ordezkariek, Lezo Herri Eskolako Zuzendaritzak, baita ikasle eta irakasleek ere. Jesus Mari Martiarena alkateak hartu du hitza lehenik, eguna iritsi dela esateko, “Lezo Herri Eskolaren urteetako eskaera egi bihurtu da eta hemen dugu estalki berria”. Olatz Aldabe Lezo Herri Eskolako Zuzendariak, berriz, herri eskola herritik sortu eta sustatutakoa dela nabarmendu du, “halako estalkiak aukera ematen digu 16:30ean ateak irekitzera, herriari ateak zabaltzera. Horretaz gain, gure erabilerari begira, modu kooperatiboan erabiltzeko diseinatu dugu eskolaren filosofiarekin bat eginez”. Inaugurazio ekitaldian gaur egungo herri eskolaren zuzendaritza taldea zegoela, baina estalkia aurreko zuzendaritza taldeek egindako lanari esker heldu dela nabarmendu du, eta eskerrak eman die eta baita zoriondu, “azkenean heldu delako”. Udalari ere eman dizkio eskerrak Aldabek, “laguntzagatik eta egindako ekarpenagatik, gustu handiz erabiliko dugu”. Estalkia inauguratzeko zinta moztu dute, ondoren, Aldabek eta Martiarenak, eta ikasleen txalo artean hasi dira dantzan Murixkako kideak. Inaugurazio ekitaldian LHko ikasleak izan dira, eta haiek saltoka inauguratu dute patioa. Ikasleek erabiliko dute estalkia eskola orduetan, baina ez dira azpiegitura berriaren onuradun bakarrak izango. Jolastoia zabalik izango da aurrerantzean lezoarrentzat egunero 21:00ak arte, eta beraz, eguraldi txarra egiten duenetan espazio estali bat gehiago izango dute herrian, aurretik Saldise Plaza zuten estalitako eremua.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.