Gau Beltza antolatu dute astearterako, jai batzordearekin elkarlanean.
Kale zaharreko arimak uxatzen, iazko San Pedroko Gau Beltzan
“Haurrek, familiekin batera jolastu, sortu eta gozatzeko lekua”, horixe, Proisak azaldu duenez, haur eta familien txokoaren funtsa. Gaineratu dutenez, “euskaraz bizi den gune goxo bat” da, “auzolana eta autogestioa” oinarri dituena, “dena denona, eta denon artean” sortu eta antolatuta.
Behin betiko Proisa eraiki bitartean, Ertin kokatuko dute haurren txokoa, udal aretoan, eta kultur gune berria eraikitzen dutenean hara lekualdatzea da asmoa. Hori lortze aldera, botoa eskatu dute Proisako lagunek
aurrekontu parte-hartzaileen prozesuan beraiek aurkeztutako proposamenarentzat.
Gau Beltza
Gau Beltza antolatu du Haurren eta Familien Txokoak astearterako (hilak 31), iaz bezala, jai batzordearekin elkarlanean. Antolatzaileek azaldu dutenez, “ohitura zaharrak berreskuratu, haurrei gaur egun duten aisialdi eredu arrotz eta kontsumistari alternatiba berri bat eskaini eta zahar eta gazteak suaren inguruan goxo-goxo biltzea” dira festaren helburuak.
Egitaraua:
- 17:30: Frontoian mozorro, soinu tresna eta eguzkilore tailerra. (Trapu eta maindire zaharrak, lastozko kapelak eta ur botila hutsak eraman).
- 19:00: kale zaharreko arima ilunak uxatuko dituzte zarata eginez eta eguzkiloreak zintzilikatuz.
- 19:30: Gaztain erreak eta su inguruko dantza plazan.
