Duela 100 urte baserritarrak nola janzten ziren ezagutzeko aukera ematen ari da Jantziaren Zentroa.
![XIX eta XX mende arteko hamasei baserritar jantzi bildu ditu Iraultzak erakusketan.](http://oarsoaldea.hitza.eus/site/files/2017/11/IMG_3071-2.jpg)
XIX eta XX mende arteko hamasei baserritar jantzi bildu ditu Iraultzak erakusketan.
Duela 100 urte baserritarrak nola janzten ziren ezagutzeko aukera ematen ari da Jantziaren Zentroa. Gipuzkoa, Bizkaia, Nafarroa, Zuberoa eta Lapurdiko XIX mende amaiera eta XX. mende hasiera arteko hamasei jantzi bildu ditu horretarako Iraultza Dantza taldeak zentroaren beheko solairuan. Orijinalak dira horietako batzuk, eta besteak, argazkietatik abiatuta sortutako kopiak, hamahiru emakumeenak, eta hiru gizonenak.
Erakusketa horretarako sarrera doakoa da, eta asteburutan bisita daiteke, larunbatetan 11:00etatik 14:00etara eta 17:00etatik 20:00etara; eta igande eta jai egunetan 12:00etatik 14:00etara.
Erakusketarekin batera bisita gidatua antolatu dute. Baserritar jantziaren azalpena egin nahi dute erakusketan bertan. Ostiralean (hilak 10) euskaraz egingo dute 19:00etan eta , 17an gazteleraz. Jantzia osatzen duen atal bakoitza nola jantzi, lotu, zein esanahia duen, jatorria eta zertarako erabiltzen den azalduko dituzte, besteak beste. Tailerrak ere antolatu dituzte baserritar zapia buruan janzten ikasteko. Abenduaren 15ean izango da hori 19:00etan eta Ramon Garciak eskainiko du. Zapiaren esanahiaz, eta koloreez mintzatuko da gazteleraz emango duen tailerrean.
Bisita gidatuetan zein tailerrean parte hartzeko izena eman behar dute interesdunek Jantziaren Zentroaren harreran, edo Oarsoaldea Turismo Bulegoaren 943 49 45 21 telefono zenbakian. Bakoitzeko 1,50 euro ordaindu beharko dituzte parte hartzaileek.
Erakusketaren aldaketa
Iraultzak jakinarazi du bestalde, erakusketa finkoa aldatuko duela, eta urte hasierarako bigarren erakusketa zabalik izan nahi du. Jantziaren Zentroak ez ditu ateak itxik0 erakusketa finkoa aldatzen duen bitartean, eta horrenbestez, Iraultza Dantza Taldeko kideak hura antolatzen ikusteko aukera izango dute bertaratzen direnek, astelehenetik igandera bitarte lan egingo baitute. Bi solairuetatik bat osorik ikusteko aukerarik izango ez denez, urte hasiera bitartean Jantziaren Zentroaren sarrera merkeagoa izango dela esan dute arduradunek.