Adin txikikoak protagonista
Udalak haur eta nerabeak protagonista izango dituen ikerketa soziologiko parte-hartzailea aurkeztu du.
Alkatea eta ikerketa gidatuko duten arduradunak egitasmoaren aurkezpenean.
“Hamar urte hauetan, bidea egiten ari gara. Haziz eta heziz goaz. Egun, amets eta erronka berriak ditugu. Horien artean lehentasunezkoa da haur eta nerabeen parte-hartzea”, adierazi zuten, eta nabarmendu zuten,orain arte ez bezala “adin txikikoak planaren erdigunera ekarri eta lehentasunezko eragile bilakatuko” dituztela. “Beraiekin batera adostu nahi ditugu planaren etorkizuneko ildoak. Zehazki, haurren eta nerabeen, eta haiekin lanean ari diren eragileen iritzi, kezka, behar eta proposamenak bildu, eta horiek hobetzeko bideak eta ekintzak adostu”,zehaztu zuten.
Haur eta nerabeen parte-hartzerako organo iraunkorra
Pasaiako Udalean haur eta nerabeen parte-hartzerako organo iraunkorra sortuko dute, eta haurren parte-hartzea praktika politikora ekarriz, eta ikuspegi inklusiboa sustatzeko, berdintasuna eta aniztasuna oinarri hartuta.
Ikerketak lau fase izango ditu. Lehen fasean elkar ezagutzeko eta trebatzeko baliatuko dute. Bigarren fasea “partekatu, hitza hartu eta entzun fasea” izango da eta diagnostikoa egin eta lan lerroak identifikatzen hasteko baliatuko dute. Ondoren, hirugarren fasean hasiko dira erantzunak emateko planifikazioa eta antolaketarekin, eta azken fasean, Ekintza Plana martxan jarri eta ospatuko dute.
Egitasmoaren bultzatzaileek nabarmendu zutenez, “lan prozesu hau guztia heziketa prozesu bat” izango da, “herriaren zereginetan haur eta nerabeen rol aktibo eta zuzenagoa” aitortzeko eta eraikitzeko.”Haur eta nerabeak autonomoagoak izatera irits daitezen lortu behar dugu, eta zerbitzuen hartzaile hutsak izan beharrean, gure herriko benetako subjektu izan behar dira”, gaineratu dute.
Haurren eta nerabeen eskubideen aldeko nazioarteko eguna
Hilaren 20an ospatzen da Haurren eta nerabeen eskubideen aldeko nazioarteko eguna, eta Pasaian urtero ospatzen da. Aurten ere aste osoko egitaraua elkarlanean antolatu dute udalak, hezkuntza-komunitateak eta herriko elkarteek. Hona egitaraua.
