Gaur aurkeztu dute dokumentala, Trintxerpeko Ziriza etxean; larunbatean estreinatuko da, Donostiako Aquariumean eta Bilboko Zinebi jaialgian igandean.
Bakailaoaren arrantzan ibilitako arrantzale pasaitarrak, Trintxerpeko Ziriza etxean, ‘Arte al agua’ dokumentalaren aurkezpenean.
Pasaiako arrantzale oso ezagunak bertan zirela aurkeztu dute gaur Trintxerpeko Ziriza etxean
Arte al agua dokumentala. 1950, 1960 eta 1970. hamarkadetan bakailaoaren arrantzan ibilitako arrantzaleen historia bildu du dokumentalak, beraien testigantzak jasoz. Han ziren gaur beraiek, dokumentalaren protagonistak, Trintxerpeko bakailao fabrikan izandakoan itsasoan bizitakoak nola oroitzen dituzten kontatzeko; muturreko lan baldintzak, arriskuak…
Olivier Van der Zee-k zuzendu du
Arte al agua dokumenta. Holandesa jaiotzez, Donibanen egon zen bizitzen dokumentalaren zuzendaria, eta bertan bizi zela ezagutu zituen Ternuan bakailaoan ibilitako arrantzaleen historiak, beraien ahotik askotan. Pasarte horiekin liluratuta, eta arrantzaleen adina kontuan hartuta erabaki zuen dokumentala berandu baino lehen egitea, eta hiru urtez aritu da horretan.
Gaurko aurkezpenean, zuzendariak Skype bidez hitz egin du prentsarekin, eta baita dokumentalerako testigantza eman duten arrantzaleekin. Estreinaldira etortzeko irrikaz dela aitortu du. “Niretzat dokumentala omenaldi bat da han arrantzan aritu ziren guztiei. Garaiko ekonomia, neurri handi batean, haiek sostengatu zuten, oso bizi baldintza latzetan, eta asko eta asko bidean geratu ziren”, nabarmendu du.
Materiala, altxorra
Oliver Van der Zee zuzendariarekin elkarlanean David Berrondo produktorea ibili da. Berrondok nabarmendu duenez, dokumentalarentzako bildu duten materiala balio handikoa da: “Arrantzaleek Kanadan erositako Super 8 kamerekin hartzen zituzten irudiak, hango berri hemengoei emateko asmoz, eta material hori da orain berreskuratu duguna”. Grabazio gehienak arrantzaleen etxeetan zeuden, kasu askotan tiraderetan ia ahaztua. Dokumentala osatzeko bildu eta horrez gain, Euskal Filmotekaren esku utzi dituzte, kultur ondare gisa gorde ditzaten.
Arte al agua dokumentala larunbatean (hilak 11) estreinatuko dute Donostiako Aquiariumean, eta igandean Bilboko Zinebi jaialdian. Zinemetara hilaren 24ean iritsiko da, eta ondoren erakutsiko dute herriz herri, kostaldeko herri arrantzaleetan.
