Oparo hasi du bidea Familia Guneak

Indartsu eta protagonistaz ase hasi du bidea Familia Guneak, izan ere, 97 familiak eman dute izena 0-6 urte arteko haurren aisialdiari erantzuna eman nahi dion proiektuan.

Ikerne Zarate Gartziarena

Errenteria-Orereta

2017/11/14

Familia Guneak 97 familiekin hasi du bidea.

Indartsu eta protagonistaz ase hasi du bidea Familia Guneak, izan ere, 97 familiak eman dute izena 0-6 urte arteko haurren aisialdiari erantzuna eman nahi dion proiektuan. Haur txikiekin aisialdiaz familian gozatzeko aukera eskaintzen zuen espaziorik ez zegoela–eta udalera jo zuten hainbat gurasok irtenbide bila. Familia horiek eta udalak elkarlanean sortutakoa da Familia Gunea proiektu berria. Lehen urratsak egin ditu, arrakastatsu gainera, parte hartzea erabaki duten familia kopuruari erreparatuta. Merkatuzarreko Jose Luis Caso aretoan prestatutako eremu balioanitzean elkartzen dira txandaka, hemezortzinaka, zehazki, familiak. Guztira bost txanda atondu dituzte, asteazkenetan goizez 10:00etatik 12:30era aritzen dira eta arratsaldez ere, 16:30etik 19:00etara. Astelehen, Astearte, eta ostiraletan berriz, arratsaldez egin dituzte txandak. Proiektuak izan duen harrerarekin pozik azaldu da Itziar Ostolaza Gazteria eta Hezkuntza zinegotzia. Honakoa, esperimentaziorako saioa izango da Ostolazaren esanetan, eta horren harira, garrantzitsua iritzi dio familien parte hartzeari eta ekarpenak egiteari, zerbitzua hobetze aldera. Ikasturte honetako izen ematea itxita dago baina hurrengo urteari begira interesa izan dezaketen familiak Gazte Informazio bulegora hurbiltzera deitu ditu, “datorren ikasturteari begira zenbat familia izango genituzkeen jakitea garrantzitsua da guretzat, proiektua beharretara moldatu ahal izateko”.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.