Kaputxinoetako ludotekak habia egin du Cristobal Gamon ikastetxean

Haurreko lokala txikia eta desegoki gelditu dela–eta Cristobal Gamon Herri Ikastetxeak hasrtu du Kaputxinoetako Ludoteka.

Ikerne Zarate

Errenteria-Orereta

2017/11/16

Cristobal gamon Herri Ikastetxeak hartuko du ludoteka.

Ibilbide luzea du Kaputxinoetako Ludotekak. Orain arte hartu duen udal lokalak, ez zituen betetzen jada espazio beharrak, txiki eta desegoki gelditu da, eta egoitza berria topatu dute, haurrak eroso eta zabal jolas daitezen: Cristobal Gamon Herri Ikastetxea. Ludoteka bera ez da berria, bai ikasturte honetatik aurrera izango duen kokapena. Atzo egin zuten agerraldia Itziar Ostolaza Gazteria eta Hezkuntza zinegotziak, Itziar Duarte Kaputxinoetako Ludotekako begiraleak, Ibai Narbarte Ludoteka eta Gaztelekuetako koordinatzaileak, eta Andoni Osoro ikastetxeko zuzendariak. Erabiltzaile eta familientzako hartutako erabakia “onuragarria” den zalantzarik ez dute Ostolazak eta Osorok. Espazioaren dimentsioa, aukerak, bitartekoak eta kokalekua nabarmendu ditu Ostolazak, “kokaleku naturala da, auzo honetako familiek bizitza egiten dutelako gune honetan. Barne eremuaz gain, gainera, kanpo eremua badauka, eskolaren jolastokiak, eta horrek dinamikak egiteko aukera handia ematen du orain arte ez genuena”. Bat dator Osoro, “Cristobal Gamon herri ikatetxea, erreferentea da hemengo familientzat, leku estrategiko eta naturala”. Lankidetza nabarmendu du Ostolazak. Izan ere, Ludotekaren kokaleku berria erabakitzeko garaian elkarlanean aritu dira ikastetxea eta udala, eta bide berri bat zabaldu dutela erantsi du, “orain arte ulertzen genuen ludoteka bakoitzak espazio propioa izan behar zuela eta momentu honetan udal espazioak konpartitzeko apustua egin dugu. Konpartitze hori oso positiboa izan daiteke eragileen eta instituzioen arteko harremanak sustatzeko”. Ikastetxeak erabiliko du espazio hori goizetan, eta ludotekak arratsaldetan. Datu orokorrak Sei ludoteka eta bi gazteleku daude Errenteria-Oreretan eta hirurehun haur eta gaztetik gora biltzen dituzte. Ludoteken kasuan, matrikula epea zabalik dago urte osoan eta une honetan 150 haur ari direla horietan esan du Narbartek. Agustinak eta Kaputxinoak auzoetan erabiltzaile kopuruak nabarmen egin duela gora erantsi du koordinatzaileak. Gaztelekuetan berriz, 130 gazte ari dira une honetan.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.