Euskararen sariak Kuadrillategi eta Mikel Ugalderentzat

Abenduaren 1ean jasoko dute Oarsoarrak saria, 19:00etan, Errenteriako Niessen Kulturgunean egingo den ekitaldian.

olatz mitxelena

2017/11/20

Gaztetatik euskararen alde egindako lana eskertuko diote Mikel Ugalde Ugarteri.

Mikel Ugalde ekintzaile eta euskaltzale errenteriarra eta Kuadrillategi egitasmoa. Horiexek Oarsoarrak Euskararen sarien aurtengo hartzaileak. 2010az geroztik banatzen ditu Oarsoaldeko Euskara Batzordeak Oarsoarrak Sariak. Aurtengo sariarekin antolakuntzak Mikel Ugalde Ugarte errenteriarra “frankismo garaitik, bere kristau konpromisoak bultzatuta” egin duen lana nabarmendu nahi izan du. Ugarte gizarte eragile izan zen hainbat kolektibotan jardunez. Zehaztu dutenez, sindikalismoa, irakaskuntza, kazetaritza eta antzerkigintza izan dira bere lan ardatzak, eta horrez gain, bere jardun soziolinguistikoa goraipatu dute, “beti ere, euskararen mesedetan eta ikuspuntu euskaltzale batetik eraginez”. Kuadrillategi egitasmoa DBHko gazte kuadrilletan hizkuntza ohiturak euskalduntzea helburuz martxan den Kuadrillategi egitasmoa izan da aurten saritutako proiektua. Eskualdeko euskara batzordeko kideek gogoratu dutenez, Pasaian sortu zen Kuadrillategi, 2002. urtean, eta handik gutxira hedatu zen Lezo eta Oiartzunera, azkenik, duela lau urte Errenterian ezarri zen arte. Euskara batzordearen ustez, Kudrillategiri esker “eskualdean gazteen artean jarduera arrakastatsu bihurtu da euskarazko aisia”, eta hortik aitortza. Abenduaren 1ean izango da sari emate ekitaldia, iluntzeko 19:00etan, Errenteriako Niessen Kulturgunean. Ekitaldi irekia izango da eta Oarsoaldeko lau udalek eta Lau Haizetarak, Prest! euskara taldeak, Oarsoaldeko AEK-k, Oarso Bidasoko Hitzak, Ttur-ttur euskaltzaleon bilguneak eta Errenteriako Udal Euskaltegiak osatutako epaimahaiak sari emate ekitaldian parte hartzera deitu dituzte eskualdeko herritarrak.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.