Parisera deitu dute presoen alde

Lanean ari dira Sare Herritarreko kideak Oarsoaldea eta Bidasoan mobilizazioaren berri emateko eta bertaratzeko autobusak antolatzen.

Ikerne Zarate Gartziarena

Errenteria-Orereta,Lezo,Oiartzun,Pasaia

2017/11/23

Baionako festetan Parisko manifestaziora deitzeko egindako agerraldia. ARGAZKIA: Bake Artisauak.

Bake artisauek manifestaziora deitu dute abenduaren 9an Parisen. Mobilizazio handia egin nahi dute euskal presoen egoera konpontze aldera, gizarte zibilaren mobilizazio masiboa eta instituzioen inplikazioa ardatz izango duena. Armagabetzearen ostean, presoen egoera desblokeatzeko etapa berriari ekin zioten Bake Artisauek, eta Parisko mobilizazioa horren adierazle izango da. Euskal presoei ezartzen zaizkien salbuespenezko neurriak amaitzea eskatuko dute bertan biltzen direnek, antolatzaileen esanetan, “lurralde honetako eragile sozial eta politikoen gehiengoak behin eta berriz eskatu duen bezala”. Horren harira, euskal presoak hurbiltzea, gaixorik daudenak askatzea, eta baldintzapeko askatasuna eskuratzeko baldintzak betetzen dituzten presoak askatzea eskatuko dute abenduaren 9an. Horri begira, lanean ari dira Sare Herritarreko kideak Oarsoaldea eta Bidasoan, mobilizazioaren berri emateko eta bertaratzeko autobusak antolatzen. Autobusak ostiralean (abenduaren 8an) irtengo dira herrietatik, eta larunbatean (abenduaren 9an) abiatuko dira Euskal Herrira bueltan manifestazioa amaituta. 12:30ean abiatuko da manifestazioa, eta euskal talde ugarik animatuko dute: joaldunak, txarangak, trikitixak, gaiteroak, txistulariak, dantzariak. Kamioi baten gainean manifestazioa animatuko dute Bad Sound System eta Fermin Muguruzak, Zebda-ko Mouss eta Hakimek, Ogres de Barbak-eko Fredo, Oreka TX, Rocek… 15:00etan amaituko da, ekitaldiaren ostean, mobilizazioa. Izena emateko Oarsoaldean

Errenteria-Orereta: Landare eta Arkaitza tabernetan.
Oiartzun: Amazkar, Kastro, Potte tabernetan, eta Garmendi txokolategian.
Pasaia: San Pedroko Antxetan.
Lezo: Errenteria-Oreretara bideratu dituzte.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.