[Galeria] Zelai berritua estreinatu du Pasaia Kirol Elkarteak

Pasaia Kirol Elkarteak zelai berritua inauguratu zuen larunbatean, garaipen batekin gainera. Klubaren etorkizunerako mugarritzat jarri zuten.

Urko Etxebeste

Pasaia

2017/11/27

Pasaia KEren talde guztietako kideen argazkia, zelai berrituan.

Don Boscoko zelaia berritu dute. Asteetako lanen ondoren, Pasaia Kirol Elkarteak larunbatean ekitaldia egin zuen behar bezalako harrera egiteko azpiegitura berrituari. Futbol taldearen talde guztiek eman zioten ongietorria zelaiari. Berritzea posible egin duten eragileek parte hartu zuten ekitaldian, Pasaia Kirol Elkarteak, Pasaiako Udalak eta Gipuzkoako Foru Aldundiak. Kirol taldearen izenean Gorka Blanco presidenteak hitz egin zuen, esanaz kirol elkartearen helburua dela kirolaz gozaraztea, gazteei kirola egiteko aukera ematea “horrela gure gazteei lagunduko diegu pertsona hobeak izaten”. Futbolarekiko zaletasuna belaunaldiz belaunaldi errotzen joan dela herrian esan zuen Blancok, eta horri segida emateko zelai berritua lanabes ezinbestekoa izan dela. Pasaiako alkate Izaskun Gomezek azaldu zuenez, Pasaia Kirol Elkartearen eskariz jarri zen udala aldundiarekin harremanean zelaia berritzeko. Eta eskertu egin zuen aldundiaren jarrera, euren egitasmoen artean lehentasunezkoen artean jarri zuelako Don Boscoko egitasmoa. Eta desiatu zuen zelaiak etorkizun oparoa izatea. Denis Itxaso Kirol diputatua ere izan zen inaugurazioan. Azaldu zuenez, Don Boscoko berritzea herrialdean abian den plan baten barrukoa dela, kirol instalazioak berritzeko 11 milioi euro jarri dituela mahaiaren gainean foru erakundeak, eta horren helburuetakoa dela herritar guztiek berdintasunean kirolaz goza dezatela. Hizketaldien ondoren, Eneko Lilly dantzariak ohorezko agurra dantzatu zuen, eta Haritz Casabal bertsolariak zelai berrituari ongietorria eman zion. Gainera, Don Boscoko ohiko ikusle eta Pasaia KEren zale amorratua den Jose Javierri taldearen elastikoa eman zioten Pasaiako buruek, bere babesa eskertzeko. Kirol elkarteko talde guztietako partaideek argazkiak atera zituzten zelai erdian. Garaipena Ekitaldiaren ondoren, futbolak hartu zuen Don Bosco. Erregional Ohorezko taldeak Beti Gazteren kontra jokatu zuen, 3-1 irabaziz. Estreinaldi ezin hobea. Garaipen horrekin hirugarren jarri dira sailkapen nagusia antxotarrak. Igoerarako borroka bete-betean daude. Jarraian, larunbatean bizi izan ziren hainbat uneren argazki galeria.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.