Iraultzaren jantzi bilduma Gordailuan jasotzeko eskatu du PSE-EE-k
934 jantzik osatzen dute Iraultza Dantza Taldearen bilduma eta horiekin batera, 126 bitxi eta osagarri dituzte.
Iraultza Dantza Taldeak duen jantzi bilduma Gipuzkoako Foru Aldundiaren Gordailua Zentroan gordetzeko eskatu du PSE-EEk. Iraultzak urteetan zehar jantzi ondare handia biltzea lortu duela nabarmendu du alderdi sozialistak: “Errenteriako Jantziaren Zentroan 30 jantzi ditu Iraultzak. Beraungo lokal batean berriz, osorik jantzitako 50 maniki dituzte. 934 jantzik osatzen dute bilduma eta gainera, 126 bitxi eta osagarri dituzte”.
Beraungo lokalaren baldintzak “batere egokiak ez direla” azaldu du PSE-EEk, “hezetasun handia dago eta intsektuen kolonizazio arriskua oso handia da. Gainera lokala hustu egin beharko dute lokalaren jabea den udalak, konponketa lanak egiten dituen bitartean. Lana horiek egin ostean, biltegiaren neurriak murriztu egingo dira”. Denis Itxaso Kultura diputatuarekin bildu direla jakinarazi du Jose Angel Rodriguez Errenteriako PSE-EEko bozeramaileak: “Foru aldundia eta Iraultza Dantza taldearen arteko hitzarmena egitea proposatu diogu, jantziak Gordailua Zentrora eraman eta bertan baldintza egokietan zaindu ditzaten”. Horretarako borondatea erakutsi duela Itxasok gaineratu du Rodriguezek. 
