8,4 milioi euroko aurrekontua izango du Lezok 2018an. EAJk eta PSE-EEk egin zuten proposamenaren alde, eta EH Bilduko zinegotziek, kontra,
8,4 milioi euroko aurrekontua izango du Lezok 2018an.
2018rako udal aurrekontua badu Lezok, 8,4 milioi eurokoa. Atzo onartu zuten EAJk eta PSE-EEk eurek landutako proposamena, EH Bilduren kontrako botoarekin.
Udal gobernuaren esanetan, aurrekontuak herritarrei gizarte beharrei erantzungo die, eta ekonomia eta enplegua sustatzea lehentasun bezala dituzte. Pertsonen ongizateari jarraipena ematen lagunduko dutela esan dute aldi berean udal agintariek.
Hein berean, kulturaren eta kultur jardueren aldeko apustu sendoa irudikatzen dute 2018ko udal kontuek, nabarmenduz herriko jaietarako, udal liburutegirako, edo kultur ekipamenduetarako gordetako dirua handitu egin dela.
Inbertsioen atalean, “Lezo atseginago eta irisgarriago” izateko neurriak aurrera atera daitezen ditu partidak daude 2018ko aurrekontuan. Neurri horien artean, Elias Salaberria kalean oinezkoentzako pasabideen altuera doitzea, musika eskolako fatxada berritzea, edo Jaizkibel hiribidean radarra jartzea proposatu dituzte.
EH Bilduren ezezkoa
Oposizioko alderdi bakarrak, EH Bilduk, ez zion udal aurrekontu proposamenari emendakinik aurkeztu. Plenoan aurrekontu proposamen horren kontra bozkatu zuten zinegotziek. Euren argudioa izan zen aurreko aurrekonturako hitzartutako hainbat emendakin, aurrera atera zirenak, ez direla gauzatu, “aurrekontuak udalaren helburuak lortzeko tresna izanda, horietako hainbatetara iristeko partidak erabili ez izana larria da gure ustez”, esan diote HITZAri alderdiko kideek. Horregatik, proposamenak egitea “alferrikakoa” dela iritzita, ez zuten ekarpenik egin, “gero ez direlako kontuan hartzen”.
Ez aurrera ez atzera egin duten gaiak —hortaz, horietara gordetako diru funtsak erabili ez direnak— 35 urtetik beherakoentzako etxe alokairu politika, enpleguaren publifikaziorako partida, edo parte hartze prozesuen bidez landutako proposamenetarako gordetako dirua aipatu dituzte, besteren artean.
EH Bilduren ustez, 2018ko kontuak gobernu taldearen “marketin ariketa” da, haien ustez herrirako proiektu sendorik ez duelako EAJ buru duen udalak. Hondakinen gaian, gainera, atez atekoarekin baino diru gehiago gastatuko duela bost edukiontzien sistemarekin baietsi du koalizioak.
