Pobrezia energetikoaren salaketa izan du aldarri gaurko elkarretaratze eta manifestazioan Duintasunak.
Pobrezia energetikoaren kontra eta pentsio publikoen alde egin du Duintasunak.
Hotzari aurre egin eta berriz ere kaleak hartu ditu Duintasunak, Gipuzkoako Jubilatu eta Pentsiodunen Elkarteak. Negua heldu ez bada ere, negu gorriko tenperaturak izan ditugu Euskal Herrian, eta horrekin lotuta, pobrezia energetikoaren salaketa izan du aldarri gaurko elkarretaratze eta manifestazioan. Gipuzkoan 70.000 familia bizi direla pobrezia energetikoan salatu du, Gipuzkoako Foru Aldundiak emandako datuen arabera, “batez ere 65 urtetik gorako pertsonak dira, bakarrik bizi diren alargunak, langabeak, edo behin behineko kontratuak dituztenek jasaten dute pobrezia energetikoa”.
Argi mintzo dira: Etxe askotan ez dute estufa pizterik, argiaren faktura ezin dutelako ordaindu.
Txanponaren beste aldean dira energia enpresa handiak. Europa osoan irabazi handienak dituzten enpresak direla salatu du jubilatu eta pentsiodunen elkarteak. Bien bitartean energiaren prezioa garestitzen jarraitzen dutela erantsi du, “iaz %12 garestitu zuten, eta aurten, oraingoz, %12 eta %14 artean”. Espainiako Estatuko gobernuak argi eta gasaren fakturetan %21eko BEZa kobratzen duela gaineratu du Duintasunak, “%4 kobratu behar duenean, premia biziko gaiak baitira”.
Pentsioez ere hitz egin du Duintasunak gaurko protestan. “Barregarri”, hala definitu du %0,25eko igoera eta gogor salatu, bien bitartean KPI Kontsumoko Prezioen Indizearen igoera pentsioena baino zazpi aldiz handiagoa izan dela.
Lan handia dagoela egiteko esan dute bildutakoek, eta horren harira, “laguntzeko” prest egon daitezkeen lagunak animatu dituzte parte hartzera, “auzo asko dira gure herrian eta gaudenon artean zaila zaigu iristea denera. Lanean jarraitu behar dugu, egoera salatzen eta horri begira jende gehiago behar dugu”. Errenteriako Udalari egin dio erreferentzia bestalde, eta zoriondu, gizarte ongizatera diru gehien bideratzen duen 20.000 biztanletik gorako herria delako.
Hurrengo hitzordua ere finkatu du. Hileko lehen astelehena urtarrilaren 1a izango denez, astebete beranduag0 egingo dute elkarretaratzea eta manifestazioa, 2018ko urtarrilaren 8an, zehazki. Ziurrenik eskatu diete Olentzero eta Mari Domingiri pentsio duinak ziurtatzeko urte berriarekin, pobrezia energetikoarekin amaitzeko, zahartzaro duin baterako eskubidea bermatzeko… lan eta ardura handiegia, ordea, Mari Domingi eta ikazkinarentzat.
