Trintxerpeko Ziriza etxean ’Emakumea publizitatearen panpina’ erakusketa zabalik dago; 36. Gerraren aurreko aldizkarietako iragarkiak dira ikus daitezkeen gehienak; bisita gidatuak eskatzeko aukera dago.
‘Emakumea publizitatearen panpina’ erakusketaren barruko kartela.
Kartelak dira, 27 guztira, ia denak Espainiako Errepublika garaiko
La revista ilustrada aldizkarian argitaratutako zuri-beltzezko iragarkiekin Virginia Gil Cousok sortuak. Iragarkiak askotarikoak badira ere, guztiak dute ezaugarri komun bat: iragarki sexistak dira.
Pasaiako Udaleko Berdintasun Sailak A25aren testuinguruan antolatu duen erakusketan ikus daitezke denak, Emakumea publizitatearen panpina izenburupean: «Emakumeoi txikitatik panpintxoen gisara hezten gaituzte», hausnartu du egileak «eta hortik izenburua», azaldu du.
Kazetaria da Virginia Gil Couso, eta, kontatu duenez, bere amonak etxean gordeta zituen aldizkariak baliatuta ondu du erakusketa. Iragarkien argazkiak egin eta ondoren photoshop-arekin landu ditu, mimo handiz. 2009an hasi zen erakusketa prestatzen, eta Pasaian baino lehen beste hainbat tokitan erakutsi duen arren, erakusketa ez da oraindik bukatu «material asko bildu eta etengabe hazten ari den erakusketa delako».
Hiru motatako iragarkiak
Isabel Mancebo Baldak, erakusketa iragartzeko sortutako ilustrazioa.
Erakusketan ikus daitezkeen iragarkietan «hiru lerrotakoak» daudela azaldu du Gil Cousok: batetik neska txikiei zuzendutakoak, «txiki-txikitatik eragin nahi dutenak»; bestetik, teknologiari edo asmakizun berriekin harremana dutenak; «Garbigailua, plantxa… emakumeak du etxeko lanen ardura baina teknologiari esker, atsedenalditxoak ditu»; eta azkenik, erabat bisualak diren iragarkiak, «panpintxo ilustratuak, hipermakilatutako emakumeak, apain-apainak, begirada galduak, eta ahoak, beti aho itxiak». Lurrinak, makillajea, depilaziorako produktuak… «Erabat bisualak diren iragarki hauek oximoron bat dira, ederrak direlako, baina, era berean, helarazten duten mezua mikatza delako».
Bisita gidatuetan, Virgina Gil Cousok horiek denak eta jasota dituen beste asko erakutsi eta aztertzen ditu bisitariekin, beti ere hausnarketa helburu.
Naomi Klein erreferente
Publizitatea oso gustuko du Gil Cousok eta argi du modu egokian erabilita oso tresna eraginkorra dela. Naomi Klein idazle kanadarra erreferentetzat du, eta haren
No logo, el poder de las marcas liburuan jazotako gertaera bat ekarri du gogora. «Nike eta Adidas bezalako markek Bronx-eko beltz gazteen irudiak baliatzen zituzten beren zapatilen iragarkietarako, beltzek planto egin zuten arte», azaldu du. Kexu ziren beltzak, beraiek erosi ezin zituzten zapatilen iragarkietarako beren irudia erabiltzen zutelako, eta zapatilak errez protestatu zuten, marka horiek modelo merkeagoak merkaturatzea lortu zuten arte. «Nik beti pentsatu izan dut hori posible dela, eta emakumeok ere antzeko zerbait lortu genezakeela halako iragarkiei planto egingo bagenie», baietsi du Gil Cousok. Motxila Gorriak elkarteko kide, urteak ditu egileak parekidetasunaren aldeko borrokan.
Erakusketa
Non. Trintxerpen, Zirizan.
Noiz. Hilaren 17ra arte.
Ordutegia. Asteartetik igandera, 10:00etatik 14:00etara eta 16:00etatik 20:00etara.
Bisita gidatuak. Asteazkenetan, 17:30ean. Ordutegi horretatik kanpo, eskaerak Zirizan egin, harreran. Sarrera doan.
