Iaz dortsal guztiak saldu zituzten proba eguna baino lehen.
Aurten, zortzigarrenez, Pasai Antxoko Gabonetako Krosa egingo da Pasai Antxon. Hilaren 23an izango da (larunbata), eta azken urteetan bezala, gauez: 20:30ean hasiko da. 6,3 kilometroko bidea du zirkuituak, Antxoko barrutiari eman beharreko lau biratan banatuta. Irteera eta helmuga Gure Zumardian egongo dira.
Lehen bira motza da, 0,4 kilometrokoa eta Antxoko barrutiaren barruan. Beste hiruak 1,94 kilometrokoak dira, Antxon eta ingurutik. Izan ere, aurtengo krosaren berritasuna zirkuituoan dago, azken hiru bira horietan zehazki: aurten, lehenengoz, Molinao-Papin errepide berria zirkuituaren barruan egongo da (bira luzean). Hau da, Luzuriagako parkeko zatia hartu ordez, Molinao auzotik errepide hori hartu, eta Ibaiondo pilotaleku ondoko biribilgunera joango da zirkuituaren zati bat, handik berriz ere Antxora sartzeko. Aldaketaren helburua izan da krosari ikusgarritasun handiagoa ematea, eta korrikalariek lasaiago eta erosoago korrika egiteko aukera izatea. 250 metroko malda ez oso gogorra du bideak.
Krosean izena emateko aukera
Kirolprobak-en webgunean dago. Aurretik webgune horren bidez izena ematen bada, txip horia dutenek 10 euro ordaindu behar dute, eta alokairuzkoa behar dutenek (zuria) 12 euro. Hilren 23an bertan, dortsalak gelditzen badira (iaz aldez aurretiko salmentan agortu egin ziren) 12 euro eta 14 euro kostatuko dira hurrenez hurren. Kupoa 250 partaidetan dago.
Dortsalak hilaren 23an bertan jaso behar dira, Ibaiondo frontoian, 18:30etik 20:00etara. Eguneko izen emateak, dortsalak baleude, 17:30etik 18:30era egin behar dira Ibaiondon. Bertan, korrikalariei euren poltsa eta oparia emango zaie. Horrez gain, kontsigna eta dutxa zerbitzua egongo dira bertan. Proba bukatzean ere, edatekoa eta jatekoa jasoko dute korrikalariek.
Behin proba amaitzean, masaje zerbitzua egongo da Ibaiondon, BI-K masaje eskolari esker. 21:45ak aldera hasiko da, Ibaiondon ere, sarien banaketa.
Sariak
Sailkapen nagusiko lehen hiru gizon eta emakumeek jasoko dituzte sariak. Horrez gain, lehen emakume nahiz gizon beteranoek jasoko dute. Lehen pasaitarrek ere izango dute garaikurra, emakumeak eta gizonak. Azkenik, mozorro onenari saria ere egongo da, Zazpitan Bai taldeak emana.
Sariez gain, partaideen artean opariak banatzeko hainbat zozketa egongo dira.
Elkartasuna
Iaz bezala, aurten ere Pasai Antxoko Gabonetako Krosak elkartasun helburua izango du. Edizio honetan, partaide bakoitzaren dortsalaren prezioaren euro bat Bekoz Beko indarkeria matxistaren kontrako eta berdintasunaren aldeko elkarteari emango zaio. Aldi berean, proba bukatzean Ibaiondon egingo den pintxo pote solidarioan jasotzen dena ere Bekoz Bekori emango zaio.
Antolatzaileak eta laguntzaileak
Ogi Berri Azkuene Triatloi Taldeak antolatzen du Gabonetako Krosa. Pasaiako Udalak nahiz Antxoko Jasi Batzordeak laguntzen dute antolaketan. Horrez gain, herriko hainbat komertzio eta ostalaritza guneren babesa du krosak. Eskerrak eman nahi dizkie horiei guztiei Ogi Berri Azkuene Triatloi Taldeak.
