Larunbatean Antxon eta San Pedron ospatuko dute San Tomas; Donibanen igandean.
Barrutiko elkarte askok parte hartzen dute antolakuntzan.
Atzo arratsean aurkeztu zuten Antxoko Jaizkibel elkartean aurtengo San Tomas Azoka. Agerraldi oparoa izan zen, han zirelako antolakuntzan parte hartzen ari diren elkarte guztietako ordezkariak: Jaizkibel bera, Lore Txorta, Basari, Armonia, Togagunea, Antxoberfest, Pasaia-Lezo Lizeoa, Kantu Jira eta Muxikoak, Laurak Bat, jai batzordea… urtetik urtera eragileen zerrenda handitzen doa Antxon, eta eragileen zerrendarekin batera, azoka bera.
Iragarri zutenez, 11:00etan zabalduko dute azoka, ohi bezala, Gure Zumardian. Han, aurten, 30 postu inguru izango dira; barazkiak, goxo gauzak, artisauak… baita animaliak ere.
Ohi bezala, mokadua eta tragoa egiteko aukera ere izango da. Taloak egin eta salduko dituzte ikastolako gurasoek, eta laguntza eskertuko dute. Horregatik deia luzatu dute, eta lanerako prestutasuna izatekotan,
mezua idazteko eskatu.
12:00etan, iritsiko da feria bere gorenera, orduan hasiko delako oholtza gaineko ikuskizuna, Pasaia-Lezo Lizeoko ikasleen eskutik. Bien bitartean, eta kalez kale, kantu jirako lagunak eta Muxikoak ariko dira, giroa barruti osara zabaltzeko. Axular plazan ere izango da txistorra dastatzerik, Anunciatako ikasleen eskutik.
Feria bukatuta, 14:30ean, babarrun jatea izango da Azokan, Topaguneak antolatuta, eta arratsaldean, 16:00etatik aurrera, DJ Porruren emanaldia, kultur etxean, festa dantzan amaitu nahi duen ororentzat.
San Pedron, Proisaren eskutik
Egun berean ospatuko dute San Tomas San Pedron, larunbatean. Proisak antolatuta, 10:00etan hasiko da feria, dianarekin. “San Pedroko artixten azoka”, berriz, 11:30ean zabalduko dute, frontoian, eta ordu erdi beranduago, toki berean, ikastolako haurren eta Lamien dantza taldekoen emanaldia hasiko da. Eta talo eta txistorrarik gabeko azokarik ez denez, frontoian ere izango da horiek dastatzerik.
Bazkaria ere antolatu dute San Pedron. Paella jatea izango da gimnasioan, 8 euroan, baina txartelak aldez aurretik erosi behar dira. Txartelak erosteko
posta elektronikora idatzi.
Festa bukatzeko kantaldia izango da lehenik mahairen bueltan, eta azkenik kalejira elektrotxarangarekin Begihaundi tabernaraino.
Donibanen, igandean
Igandean ospatuko dute San Tomas Donibanen. Itsas Mendi elkarteak antolatzen du urtero azoka, eta aurten ere hala izango da. 11:00etatik aurrera, plazan, bertako produktuen eskaintza zabala izango da, baita txistorra pintxoa dastatzeko aukera ere. Lizeoko haurren emanaldia, berriz, 12:00etatik aurrera, plazan bertan.
