Aniztasuna lantzeko erronken berri emango dute larunbatean

Orain, prozesuaren ondorioak gizarteratuko dituzte, eta festa giroan amaituko dute diagnostiko fasea familia argazkia eginda.

Ikerne Zarate

Errenteria-Orereta

2017/12/14

Gaur aurkeztu dute prozesua Xenpelar Etxean.

Prozesuaren aurkezpen ekitaldia.

Aniztasuna eta elkarbizitzaren gaineko diagnostiko parte hartzailea egiteko prozesua abiatu zuen pasa den hilabetean Errenteriako Udalak. Helburua, elkarbizitzan eta herri kohesioan mugarri izango den herri aliantza gauzatzea. Horri begira, hilabetez, aniztasunaren eta elkarbizitzaren gaineko diagnostikoa sustatu du udalak, eta horretarako, Errenteria-Oreretak dituen beharrak eta erronkak aztertu dituzte hainbat alorretako eragile eta herritarrekin. Prozesuaren barruan, egungo egoera aztertu du udalak, aurrera begirako erronkak aztertu ditu, eta azkenik, konpromisoak hartu ditu alorrez alor. Orain, prozesuaren ondorioak gizarteratuko dituzte, eta festa giroan amaituko dute diagnostiko fasea familia argazkia eginda. Larunbatean izango da hori Reina aretoan 11:00etatik 13:00etara. Lehenengo fasean identifikatu dituzten erronka guztien laburpena egingo dute Virginia Imaz pailazoak eta Axpi marrazkilariak. Proiektuaren hurrengo urratsen berri emango dute ondoren, eta amaitzeko Esmalteria plazan hainbat txoko antolatuko dituzte: Munduko jolasen txokoa, Kromosomak kudeatuko duena; Atxikimenduetarako txokoa, Bernardo Atxagaren testuan oinarrituta; eta ekarpenetarako txokoa, diagnostiko faseko emaitzei ekarpenak egiteko. Ekitaldia irekia izango da, eta herritar guztiak deitu dituzte parte hartzera, lehenengo fasean aritu direnak, zein aritu ez direnak, “aurrera begira ere, ezinbestekoa izango delako elkarbizitza ehuna alor, izaera, eta jatorri desberdinetakoen artean eratzea, udalerriaren batasuna eta indarra handiagoak izateko”.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.