Lezoko Gazte Asanblada, elkartasunaren bidetik

Lezoko Gazte Asanbladak jakiak bilduko ditu Langileen Elikagai Banku Solidarioari emateko. 23an hitzaldia egingo dute, bankuaren berri emateko.

Urko Etxebeste Petrirena

Lezo

2017/12/20

Gazte Asanbladako kideak, iazko bilketan.

Larunbaterako eta iganderako bi jarduera antolatu ditu Lezoko Gazte Asanbladak. Lotura dute biek: elkartasunaren ildotik doaz. Eta elkartasun keinu horiek Langileen Elikagai Banku Solidariora bideratuko dituzte, elikagaiak bilduz talde horrentzat. Lehenik eta behin, informazioa. Hilaren 23an (larunbata) 19:00etan eta Ibai Ondon, Langileen Elikagai Banku Solidarioa zer den azaltzeko aurkezpena egingo dute. “Hitzaldian, bankuaren funtzionamendua, krisiaren ondoriozko gizartearen egoera, txiroen estigmatizazioa, arrazakeria eta beste hainbat alor ukituko dira”, esan dute Gazte Asanbladako kideek. Behin ezagutza izanda, akziora pasatuko dira lezoar gazteak: hilaren 24an, igandea, 11:00etan Karlos Saldise plazatik hasita, elkartasun kantu jira egingo dute. Dirua beharrean, elikagaiak eskatuko dituzte elikagaien banku horri emateko. Eta haiengana elikagaiak emateko hurbiltzeaz gain, gazteek jakinarazi dute Zubitxo janari dendan, Eroskin, Lezoko Dian, Arruti ahizpak dendan postuak jarriko dituztela horietan erosketa egiten dutenek horietan elikagaiak utz ditzaten. Hilaren 23ko eguerdira arte izango da hori egiteko aukera.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.