[Galeria] Txistorra eta Saratxo gaurko protagonistak

Giro polita, paregabea eta txistorra eta talo usaina nonahi. 11:30etan egin dute San Tomas eguneko pregoia. Egun osoan hamaika ekintza gozatzeko izango dira

Ikerne Zarate Gartziarena

Errenteria-Orereta

2017/12/21

Goiz eta eguerdi partean jende ugari ibili da azokan.

Giro polita, paregabea eta txistorra eta talo usaina nonahi. 11:30etan egin dute San Tomas eguneko pregoia eta gozatzera deitu ditu errenteriar guztiak Sara Dorronsoro Landarbaso abesbatzako kideak. Landarbaso izan da aurtengo omendua. Saratxo izena, bere omenez jarri diote txerriari. Lasto artean, tartean behin azaldu du burua eta altxa da inguruan zituenei argazkiren bat egiten uzteko, baina etzanda, lozorroan izan da goizean, behintzat. Bere pisua kalkulatzen saiatzen aritu da bat baino gehiago, eta hala jarraituko dute egun osoan zehar. 50 zentimoren truke txerriaren pisua esan eta irabazleak haren pisua eurotan eramango du. Jaki gozo, gazi, edari, ogi, gazta… erosteko eta bista alegratzeko hamaika postu Zumardian, baita ekologikotik eta tokian tokikotik ere, tartean, Labore Oarsoren produktuak eta Zituneren pasta. Artisauenak berriz, Foru plaza inguruan, eta han ere erosteko ukendu, poltsa, panpinak, hamaika aukera. Nagusitan nagusia gaurkoan, txistorra eta postuetan horretan ari ziren txistorra egin eta egin, eta urtero bezala ilara luzeak izaten ari dira taloen postuan. Elkartasunak izan du tartea, eta preso eta iheslarien aldeko argazkia egin dute Mikelazulo pasabidearen aurrean hamarnaka lagunek, haiek etxean nahi dituztela esateko. Arratsaldez ere izango da non gozatu. 17:00etan txapel jaurtiketarekin hasiko dituzte ekitaldiak eta gauera arte luzatuko da giro paregabea.

Egitaraua

17:00etan. Txapel jaurtiketa txapelketa, Foru plazan.
17:30ean. Herri kirolak, Lehendakari Agirre plazan.
17:30ean. Dantzaldia, Xabier Olaskoaga plazan.
18:00etan. Deiadar txaranga, San Tomas lagun diren tabernetan.
18:30ean. Jauziak Zumardian, eta trikitilariak, kalez kale.
20:30ean. Sari banaketa Zumardian

Honako taldeak ibili dira, Errenteriako Udalarekin elkarlanean, aurtengo San Tomas Eguna antolatzen: Ereintza Dantza Taldea, AEK, Oiartzo Batxilergo Ikastolako ikasleak, Gaztelan, Sputnik, Landarbaso abesbatza, Oarso Taldea, Koldo Mitxelenako ikasleak, Alaia, Alaitasuna, Pikoketa elkarte errepublikanoa, Gazte Sozialistak, Doike, Motorbike, Oarso lifestyle, Oreretako burusoilen elkartea, Oreretako 4ak askatu, Oiarso Saskibaloi Taldea eta Stokke futbito taldea.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.