Larri gaixo dauden Aitzol Gogorza eta Mikel Arrieta preso oreretarrak etxean nahi dituztela esan zuten bildutako hamarnaka eta hamarnaka lagunek, eta hurrengo urratsa, urtarrilaren 13an Bilboko kaleak betetzea izango dutela.
Aitzol Gogorza eta Mikel Arrieta larri gaixo dauden presoen aldeko manifestazioa. Argazkia: Borja Arbelaitz
Manifestazio jendetsua egin zuen sare Herritarrak pasa den larunbatean. Larri gaixo dauden Aitzol Gogorza eta Mikel Arrieta preso oreretarrak etxean nahi dituztela esan zuten bildutako hamarnaka eta hamarnaka lagunek, eta hurrengo urratsa, urtarrilaren 13an Bilboko kaleak betetzea izango dutela. Herriko Plazatik abiatu zen manifestazioa 18:00etan, hura zabaltzen anbulantzia, eta haren atzean
Prest Gaude, Aitzol eta Mikel Etxera. Giza eskubideak, konponbidea, bakea zioen pankarta.
Larri gaixo daden bi oreretarrak etxean behar dutela esan eta Bilbora deitu zuten bildutakoek. Horren harira, manifestazioaren ibilbidean zehar, hainbat artista eta eragilek beren ekarpena egin zuten, prest daudela agertzeko.
Prest gaude, hori da Sare Herritarrak hilaren 13an Bilbon egingo duen manifestaziorako aukeratu duen leloa. Presta daudela azaldu zuten manifestazioan bildutakoek ere, Biteri kalearen parean egin zuten mosaiko argitsuaren bidez. Agirre lehendakariaren plazan amaitu zen manifestazioa. Bertan adreiluz adreilu osatu zuten
Prest gaude! Aitzol eta Mikel etxera esaldia.
Hitza hartu zuten ondoren antolatzaileek, Arrieta eta Gogorzaren egoera saltzeko. Gogorzak obsesio konpultsibo nahasmena du eta Basauriko espetxean aurkitzen da. Hemeretzi urte daramatza espetxean Gogorzak. Bere eritasunagatik azken urteetan 29 alditan ingresatu dute ospitalean. Kondena beteta eduki arren espetxean jarraitzen duela salatu zuten.
Arrietaren kasua abuztuan jakinarazi zuten. Aurretik gaixotasunaren zantzuak bazituen ere, orduan eman zioten diagnostikoa oreretarrari: espondilartropatia kroniko seronegatiboa HLA B 27 positiboarekin du. Algeciraseko (Andaluzia, Espainia) espetxean da Arrieta Euskal Herritik 1.100 kilometrora. Gaixotasun larria, sendaezina, eta degeneratiboa da Arrietak pairatzen duena.
Bi diagnostiko ezberdinen baina egoera bakarra bizi dutela bi oreretarrek esan zuten: “giza eskubideen urraketaren adibide nabarmena, eta gure ustetan egoera bateraezinak espetxeko egonaldiarekin. Etsipenera kondenatu nahi gaituzte, baina herri honek aspaldi egin du konponbidearen aldeko hautua, espetxe politika konfrontazio klabeetatik, konponbide klabeetara eramatea eskatzen dugu, salbuespen neurriekin amaitzea, giza eskubide guztiak errespetatuak izan daitezen”.
Horretarako, herritarrak ikusle izatetik protagonista izatera pasatzea ezinbestekoa dela esan zuten eta horretara deitu, “jarrera aldatzera, bakoitzak bere eremutik ekarpenak eginez lortuko dugulako giza eskubideen urraketarekin amaitzea eta Aitzol eta Mikel etxeratzea. Eta ziur gaude lortuko dugula”.
