Portuak udala salatu izana deitoratu, eta elkarrizketaren bideari heltzeko eskatu dute.
Arte garaikideko Manifesta 5 azoka Zirizan egin zenetik askotarikok izan dira bakailao enpresa izandakoan egin diren topaketa eta jarduerak.
Jeltzaleek “zentzugabetzat” jo dute
Portuaren salaketa, eta kexu agertu dira, “Portu Agintaritzak ez duelako inoiz erakutsi ez elkarrizketarako ez eta negoziaziorako borondaterik”.
Horrez gain, Portuak Zirizaren mantenuari bizkar eman diola salatu du jeltzaleen bozeramaile Nahikari Oterminek, eta udalak inbertsioak egin ezean, erakina “erabat hondatuta” egongo litzatekeela ohartarazi du.
Zentzu horretan, udalak Zirizaren egokitze lanean 1,2 milioi euro inbertitu dituela gogoratu du, eta inbertsio horiei esker, Zirizari “bizitasuna eman” zaiola eta “herritarrek kulturguneaz gozatzeko aukera” izan dutela goraipatu du Oterminek. “Udalak, pasaitarren interesen defentsan, uko egin dio 230.000 euroko zor hori ordaintzeari, egindako 1,2 milioi euroko inbertsioen bitartez guztiz ordainduta dagoela ulertuta”, argudiatu du.
Elkarrizketarako deia
EAJk jakinarazi duenez, duela hilabete batzuk bi hitzarmen idatzi zituzten Pasaiako Portu Agintaritzarekin akordio lortu eta Zirizaren erabilera erregularizatzeko asmoz. Hitzarmen batean tasen ordainketa jasotzen zen, baina gastu hori orekatzen zen bigarren hitzarmen baten bitartez. Oterminen arabera, udala eta Portua ados zeuden aipatutako hitzarmenekin; baina, portuko zerbitzu juridikoak hitzarmenetako bati uko egin ziotela, eta ondorioz, udalak bigarrena alde batera utzi zuela jakinarazi du. Ondoren etorri da Portuaren salaketa.
“Jeltzaleek ez dute ulertzen eta zentzugabetzat jo dute Portuak jarri duen salaketa erakundeen arteko egungo elkarlan testuinguruan”, esan dute, horregatik, “elkarrizketaren bideari heltzeko eta akordioetara iristeko borondatea izateko eskatu dute”.
Zirizaren doako erabilera ere defendatu dute. “Portuak nahiko balu, doan utzi diezaioke eraikina herriari, borondate kontua da”, adierazi du Nahikari Oterminek. Borondate politikorik ezean, urteetan dirauen gatazka honi behin-betiko irtenbiderik ematea zaila izango dela iritzi diote jeltzaleek.
