Baten beharrean, bitan egingo dute kabalgata Errege Magoek Errenteria-Oreretan. Beraunen eta Erdialdean egingo dute desfilea Meltxor, Gaspar eta Baltasarrek.
Errege Magoen desfilea Errenteria-Oreretan iaz.
Baten beharrean, bitan egingo dute kabalgata Errege Magoek Errenteria-Oreretan. Beraunera helduko dira lehenik Ongi Etorri Beraungo auzo elkartearen eskutik, eta azken horren egoitzatik abiatuko dira 17:30ean Beraungo kaleetan barrena ibiltzeko. Ordu erdi beranduago berriz, 18:00etan abiatuko da Errenteriako Udalak, Jai Tokik, Euforiak, Gurutzearen alabak ikastetxeko IGEk eta Telleri alde ikastetxeko IGEk antolatuta erdialdean barrena ibiliko den desfilea. Honako ibilbidea egingo du desfileak: Arramendi pasealekua, Errioxa biribilgunea, Tulle, Maria de Lezo, Xenpelar, Biteri, Alfonso XI, Nafarroa Etorbidea, Gamon Zumardia, Herriko Plaza, Foru Plaza eta Merkatuzar. Azken horretan harrera egingo diete 19:30ean Meltxor, Gaspar eta Baltasarri.
Kabalgatak, gainera, trafiko aldaketak eragingo ditu herrian. Desfileak ibilbidea egingo duen kaleetan ibilgailurik ezingo da egon, hilaren 5ean, beraz, ezingo da horietan aparkatu 10:00etatik 22:00etara. 17:30ean trafikoa etengo da Beraun kalearen eta Arramendi pasealekuaren arteko bidegurutzean eta Aralar plazan. 18:00etan, berriz, Galizia biribilgunean moztuko da trafikoa eta GI-636 saihesbidera desbideratuko da. 17:30etik 22:00etara trafikoa moztuko da erdialdean. Hori dela eta, urtarrilaren 5ean erdialdetik ez pasatzea eskatu die gidariei Udaltzaingoak, eta auzoetara joateko beste bide batzuk hartzea gomendatu dute. Asto tokian ere ezingo da aparkatu ostiralean 10:0etatik 22:00etara.
Garraio publikoan ere eragingo ditu aldaketak desfileak. Morronguilleta kaleko geltokia, Tulle kalera lekualdatuko dute, eta azken hori libre geratzen denean desfilea pasata hasiko dute zerbitzua. 18:00etatik 19:00etara Zumardiko eta Gabierrotako geltokietatik ez da autobusik pasako, eta horregatik, gomendatu dute Diputazio plazako geltokia erabiltzea.
Azkenik, Izteita pasealekuan aparkatzea baimenduko dute urtarrilaren 6an, 07:00etatik 22:00etara.
