Ertzaintzak eta Guardia Zibilak elkarlanean egindako operazio batean Errenterian bahitutako gizon bat askatu dute Tarragonan.
Bahitzaileak atxilotzeko uneko irudia. Argazkia: Espainiako Barne Ministerioa
Ertzaintzak eta Guardia Zibilak elkarlanean egindako operazio batean Errenterian bahitutako gizon bat askatu dute Tarragonan. Segurtasun Sailaren arabera, Frantziako talde arriskutsu batek bahitu zuen gizona Beraun auzoan joan den abenduaren 9an. Ertzaintzaren iturriek azaldutakoaren arabera, etxetik noiz irtengo zain zeuden lau gizon hurbildu zitzaizkion biktimari kalean, bere etxe inguruan. Gogor kolpatu zuten, eta pistolaz auto batean sartu ondoren.
Biktimaren anaiak Errenteriako Ertzain Etxean salaketa jarri zuen hurrengo eguneko goizaldean: “Salatzaileak adierazi zuen bahitzaileak, Malagan bizi den beste anaia batekin jarri zirela harremanetan telefonoz, eta hura askatzeko miloi erdi euroko erreskatea eskatu zioten, hiltzeko mehatxua eginez”. Ertzaintzaren Ikerketa Kriminaleko Unitateko pertsonen aurkako delituen atalak egin du ikerketa, eta bertako ikerlariak Guardia Zibilaren Unitate Zentraleko Homizidioen, Bahiketen eta Estortsioen Atalarekin jarri ziren harremanetan, “elkarlanari esker kokatu genituen bahitzaileak eta bahitua Alacanten. Biktimaren anaiarekin behin baino gehiagotan jarri zen harremanetan talde kriminala, baina bahitzaileen eta estortsioa egindako anaiaren arteko negoziazioek porrot egin zutenez, kriminalek Frantziara ihes egin eta biktima hiltzea erabaki zuten”.
Ondorioz, polizia operazio azkarra egin dutela gaineratu du Ertzaintzak, eta joan den abenduaren 11n askatu zuten bahitua eta bi bahitzaileak atxilotu L´arboc del Penedeseko (Tarragona, herrialde Katalanak) gasolindegi batean. Aurretik zihoan autoa ere atzeman zuen poliziak La Jonquerako mugatik (Girona, Herrialde Katalanak) hiru kilometrora, eta autoan zihoazen bi bidaiariak atxilotu. Azken auto horretan, pistola elektriko edo taser bat, eta gertatutakoarekin zerikusia zuen hainbat material atzeman zuten beti ere polizia iturrien arabera.
Bahitutako gizona osasun zentrora eraman zuten, bahitzeko unean jasotako kolpeak sendatzera, eta askatu eta hiru egunera elkartu zen familiarekin Oiartzungo Ertzaintzaren lurraldeko egoitzan. Atxilotutako guztiak, berriz, 27 eta 40 urte artekoak dira eta atxilotu zituzten guardia epaitegien esku utzi ondoren, espetxeratuta daude guztiak. Polizia operazioa ez zen hor amaitu eta herenegun, bahitzaileak eta bahitua bere etxean gorde zituen pertsona atxilotu zuten, 47 urteko gizona da eta espetxeratzeko agindua eman zuten. Atxiloketa gehiago izatea ez dute baztertu.
Bigarren aldiz bahitua
Biktima bahitzen zuten bigarren aldia izan dela jakinarazi du Segurtasun sailak: “2012an bahitu zuten lehenengo aldiz eta Frantzian askatu. Talde kriminal berbera izan zen, eta diru kopuru handia eskatu zioten”. Orduan ere Errenterian bahitu zutela jakinarazi dute, eta hiru bahitzaile atxilotu zituztela, “Haietako bi abenduan atxilotutako lauren artean daude. Kasu hartan, bi eraso fusil, pistola bat eta errebolber bat atzeman zitzaizkien”.
