Antxon Ahobizi eta Belarripresten bila hasiak dira
Martxoaren 15, 16 eta 17rako egin dute lehen deialdia
Antxoko euskaltzaleek lehengo asteartean egin zuten lehen bilera, kultur etxean, Ahobizi eta Belarriprest iniziatiba martxan jartzeko. Hainbat erabaki hartu eta jakinarazi dituzte jada. Martxoko hirugarren asteburua aukeratu dute deialdirako (martxoak 16, 17, eta 18) eta parte hartzaile bila ere hasiak dira. Ahobizi zein Brelarriprest izan nahi dutenek posta elektronikoz eman behar dute izena.
Ahobizi eta Belarriprest Iniziatiba beste hainbat herritan martxan izan da iaz, Errenteria-Oreretan eta Oiartzun kasu. Aurten, baina, bultzada eman nahi dio Eusko Jaurlaritzak iniziatibari, eta horretarako, Euskaraldia 11 egun euskaraz lelopean kanpaina bat abiatuko du, udalekin elkarlanean, azaroaren 23tik abenduaren 3ra.
Antxon, baina, deialdi orokor horri aurreratu eta «entsegu modukoa» antolatu nahi dute udaberrirako.
Hizkuntz ohituretan eragin
Herritar euskaltzaleak aktibatuta hizkuntza ohiturak aldatzea da Euskaraldiaren helburua. Euskal Herriko hainbat euskaltzale elkartek urteetan zehar landu duten Euskarak 365 egun lan ildoaren barruan kokatzen da eta bi mugarri izango ditu: batetik, euskal hiztunen hizkuntza ohituretan eragitea eta beren harreman sareetan euskara gehiago erabiltzea, eta bestetik, 2019an, mota guztietako entitateek euskararen erabilera babesteko eta bultzatzeko neurriak hartzea.
Herritarrak euskararen alde aktibatzea da helburua, eta horregatik, euskaraz hitz egin edo ulertzeko gai diren herritarrak izango dira iniziatibaren protagonistak. Euskararen Nazioarteko Egunaren atarian, 11 egunetan zehar, beren ohiko harreman sareetan euskaraz aritzeko gonbidapena egingo zaie izena ematen dutenei, inertziak apurtu eta euskarazko hizkuntza praktikak bultzatzeko helburuz. Izan ere, Euskaraldiak hizkuntza ohituretan eragin nahi baitu, euskararen erabilera sustatzeko.
Tokian tokiko euskaltzaleak izango dira herri bakoitzeko dinamiken sustatzaileak, iniziatiba errealitate soziolinguistikora moldatuta. 
