Lagunduz iniziatiban parte hartzeko epea luzatu dute

Bokazio soziala duten proiektu ekintzaileen garapena errazteko jaio dela proiektua esan zuten aurkezteko unean arduradunek.

Ikerne Zarate Gartziarena

Errenteria-Orereta

2018/01/29

Errenteria Irabazizeko kideak gaurko agerraldian.

Errenteria Irabazizeko kideak proiektua aurkezteko aurkezpenean.

Lagunduz proiektua aurkeztu zuen Errenteria Irabaziz hautesle Elkargoak pasa den abenduaren 1ean. Hilabetearen 31 (asteazkena) zen proiektuak aurkezteko azken eguna, baina epea luzatu dute orain, otsailaren 16a arte. Bokazio soziala duten proiektu ekintzaileen garapena errazteko jaio dela proiektua esan zuten aurkezteko unean, eta horren harira, proiektu horiek abian jartzeko ekarpen ekonomikoa egingo du Errenteria Irabazizek, 6.000 euro guztira proiektu bakarra edo gehiago laguntzeko, “aurkezten direnen artean erabakiko du batzarrak zeintzuk lagundu”. Parte hartu ahal izateko, Errenteria Irabaziz taldea arautzen duten oinarri etikoekin kontraesanean ez dute egon beharko erakunde eta kolektiboek, irabazi asmorik gabeko elkarte formala izan beharko du eta gizarte interesak izan beharko ditu, inskribatua egon beharko du erregistroan, egunean egon beharko du betebehar fiskal eta laboraletan, eta aurkeztutako proiektua aurrera eramateko gaitasun teknikoa egiaztatu beharko du. Kolektibo edo erakundeak, bestalde, aurretik egindako jarduerei buruzko memoria aurkeztu beharko du. Diruz laguntzea erabakitzen diren proiektuek, gainera, alokairua, hornidura, ura, argia edo antzekoak, ezta nominak, dietak, edo web orriak ordaintzeko erabili. Proiektuak Kapitanenea 5, behean duen egoitzan aurkeztu behar dituzte interesdunek. Aurkezten dutenen artean, batzarrak erabakiko du zein proiekturi edo proiektuei eman laguntza: “Xede horretarako eratuko den lantaldeak egingo duen balorazio teknikoaren araberakoa, eta diru laguntza justifikatzeko txostena egingo da”. Aukeratutako proiektuak gauzatzeko, hamabi hilabeteko epea izango dute kolektiboek; egokitutako diru kopuruaren %40 eskuratuko du hautatzeko unean, %30 handik sei hilabetera, eta gainontzeko %30 proiektua amaituta. Azken bi faseetan une horretaraino egindako lanaren gaineko memoria bana aurkeztu beharko dute.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.