Ofizio dantza hastear

Atzo arratsaldean egin zuten aurkezpena eta aurten, indar berezia egin dutela herritar guztien gozamenerako, adin guztietarako egitaraua antolatzeko.

Ikerne Zarate

Errenteria-Orereta

2018/02/01

Atzo aurkeztu zuten inauterietarako prestatutako egitaraua.

Ofizioak. Hori da aurten herritarrek inauteriei begira aukeratuta duten gaia, eta horren bueltan antolatu du egitaraua inauteri batzordeak. Atzo arratsaldean egin zuten aurkezpena eta aurten, indar berezia egin dutela herritar guztien gozamenerako, adin guztietarako egitaraua antolatzeko. Kaldereroek larunbatean iragarriko dituzte inauteriak, eta Iñude eta Artzainen desfilearekin amaituko dira hilaren 18an. Tartean, ofizioetan oinarritutako inauteriak izango dira, eta horien barruan, hainbat hitzordu nabarmendu zituen atzoko agerraldian Inauteri batzordeak. Inauterien hasiera da horietako lehena. Hilaren 8an, ostegunarekin, ekitaldi berezia izango da Herriko Plazan: “Azeriko lagunak udaletxeko balkoira irtengo dira jaiari hasiera emateko, eta ondoren, Azeri dantza koloretsua izango da jarraian”. Herri bazkariari, aipamen berezia egin zioten. Hilaren 10ean antolatu dute 14:00etan Merkatuzarren, eta txartelak salmentan jarritako egun berean agortu ziren. Mahairen bueltan 500 lagun bilduko dira, eta horiei guztiei eskerrak eman zizkieten antolatzaileek. Tabernen arteko mozorro lehiaketan, bestalde, bederatzik eman dute izena: landare, Zuketz, Kerala, Aker, Egiburu, Sindikato, Xera, gamon 14 eta Zuzen. Arte ederretan aditua den talde batek sari nagusia emango badu ere, herri bozketaz aukeratuko dute herritarrek tabernarik gustukoena. Bozkatzeko aukera hilaren 8tik 13ra arte izango dute herritarrek. Inauteriei begira antolatu duten egitarau osoa, gaurtik dago eskuragarri udal eraikin publikoetan, hainbat kiosko eta turismo bulegoan. Baita Herribizia webgunean ere. Herritarrak ofizioz mozorrotu eta inauterietan parte hartzera deitu dituzte, baita argazkiak eta txioak partekatzera ere. Horretarako sare sozialetan #ofizioeninauteria traola erabiltzea eskatu dute, “Errenteriako inauterien kontakizun kolektiboa osatzeko guztion artean”.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.