Azkueneko 11 bizilagun etxetik kanpo pasatu dute gaua
Luizi batek kalteak eragin ditu beren etxeetan.
Euriteen ondorioz luizi bat izan zen atzo Trintxerpen. Mendia behera etorri eta harri handiek jo dute Azkueneko kaleko 38. zenbakiko etxeen kontra. Suhiltzaileak eta udaltzainak bertaratu ziren bizilagunen deia jaso eta berehala, 21:00ak aldera, eta etxearen egoera ondo baloratu bitartean, bizilagunak etxeetara ez itzultzea erabaki zuten.
Bi familiei udalak eman die ostatu eta gainontzekoek senitartekoen etxeetan eman dute gaua, hirigintza zinegotzi Nahikari Oterminek jakinarazi duenez.
Udal arkitekto eta teknikariak gaur goizean aritu dira egoera aztertzen, eta etxea ez dagoela arriskuan baieztatu dutela jakinarazi berri du hirigintza zinegotziak. Gauzak honela, kaltetuak gaur bertan itzuliko dira beren etxeetara.
Bien bitartean, zonaldea garbitzeari ekingo diote, eta kaltetuek mendi magala egonkortzeko proiektu bat egin beharko dutela aurreratu du Oterminek, erori den lur zatia bizilagunen jabetzakoa delako.
