Duintasunaren elkarretaratzearekin bat egin du Errenteria Irabaziz-ek

Elkarretaratzera deitu du ostegunerako Duintasunak, pentsioen %0,25eko igoera salatzeko. Duintasunaren iniziatibari, "babes osoa" adierazi dio alderdiak.

Ikerne Zarate

Errenteria-Orereta

2018/02/20

Duintasunaren hilabete honetako elkarretaratzea.

Elkarretaratzera deitu du ostegunerako Duintasunak, pentsioen %0,25eko igoera salatzeko. Herriko plazan bilduko dira 11:00etan eta bertatik Correosen bulegora joango dira. Helburua, pentsioen %0,25 igoera jakinarazteko bidali dizkieten gutunak itzultzea dute, eta horrekin ezinegona eta haserrea azaltzea. Elkarretaratze horrekin bat egin du Errenteria Irabaziz Hautesle Elkargoak, eta herritar guztiak gonbidatu ditu parte hartzera. Jubilatu eta pentsiodunen iniziatibari, “babes osoa” adierazi dio alderdiak. Urtarrileko plenoan, pentsio publikoen alde eta sistemaren iraunkortasuna bermatzeko neurriak proposatzen zituen mozioa aurkeztu zuela ekarri du gogora Errenteria Irabazizek. Alderidak gaitzetsi egin du PPren Gobernuak aurtengorako onartu duen pentsioen %0,25eko igoera: “Izan ere, KPI-aren igoera bost aldiz handiagoa da, %1,20koa. Txirotasunera kondenatzen ari dira adinekoak, pentsiodunen %49,9 ez da gizarte bazterketaren muga ezartzen duen 667 eurora heltzen hilean”. Pentsioen murrizketaren eraginekin amaitu beharra dagoela esan du Errenteria Irabazizek, “PSOEk 2011neta PPk 2012an egindakoak. Ezin dugu ahaztu PSOEk erretiroa hartzeko adina 67 urtera igo zuela eta pentsioaren %100 kobratu ahal izateko kotizazioa 35 urtetik 37 urtera igo zuela. Rajoyren exekutiboak gainera, iraunkortasun faktorea txertatu du. Horrek pentsioak %5 murriztuko ditu hamar urtero 2019. urtetik aurrera”. Duintasunak deitutako mobilizazioaren antzekoak “beharrezkoak” direla esan du amaitzeko, “jokoan baitago adinekoen egungo duintasuna irabaztea, baita etorkizun duina guztiontzat”.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.