Hezitzailea, halakoa izango da aurten ere udalaren aisialdi proposamena, Ostolazak nabarmendu duenez, "etorkizuneko Errenteria gaurko haurrek eraikiko dutelako".
Gracia, Ostolaza eta Narbarte gaurko agerraldian.
Aurtengo Udako oporrak kanpaina aurkeztu dute gaur goizean Itziar Ostolaza Gazteria zinegotziak, Eñaut Gracia Komunikazio eta Parte Hartze zinegotziak, eta Ibai Narbarte udal aisialdi zerbitzua kudeatzen duen enpresaren koordinatzaile. Hezitzailea, halakoa izango da aurten ere udalaren aisialdi proposamena, Ostolazak nabarmendu duenez, “etorkizuneko Errenteria gaurko haurrek eraikiko dutelako”. Hezkuntza ez formala erronka garrantzitsua dela udalarentzat gaineratu du Gazteria zinegotziak, “herri hezitzaile bat eraikitze bidean, sinisten dugulako espazio horietan egiten den lana eta balore zehatzetan heztea gure haurrak funtsezkoa dela oraina osatzen duten haur guzti horien hazkuntza prozesuan, eta ulertuta etorkizuneko Errenteria beraiek izango direla. Aisialdia beraz, estrategikoa da gizarte kohesio baten bidean eta gizarte aniztasun horren barruan herritar askeak sortzeko”.
Erronka handia izango dutela aurten aurreikusi du, “espero dugu beste urteetan bezala familia eta haurrek beste urteetan bezain ongi erantzutea, baita guk ere haiei ahalik eta ongien erantzutea eskainiko dugun zerbitzu honekin”.
Izena emateko online plataforma
Aurten aldaketa izango dela zehaztu du Ostolazak. Izena emateko garaian, gurasoei lana erraztu nahi izan die udalak, eta online plataforma zabaldu du udalak horretarako. Izena emateko epea astelehenean zabalduko du udalak (hilak 12) eta hilaren 23ra arte izango dute izena emateko aukera Errenterian erroldatuta dauden haur eta gaztetxoek. Bi aukera izango dituzte gurasoek, etxetik eroso plataformaren bidez kudeatzea udako oporren gaineko guztia, edota
Zu! Zure Udala zerbitzua erabiltzea, izen ematea modu presentzialean egin nahi izanez gero.
Duela hiru aste zabaldu zuela Udalak
Zu! zerbitzua gogorarazi du Graciak: “zerbitzua baino gehiago da kontzeptua edo administrazioa ulertzeko modua. Herritarrak jardun politiko eta administratiboaren erdigunean kokatzen ari gara, eta zentzu zabalean, udalak dituen zerbitzu eta espazio guztietan. Udako Oporren kanpainan 1.000 haurrek hartzen dute parte eta gure buruari galdetu diogu nola erraztu guraso horien izen ematea. Horri begira sortu dugu aipatu plataforma, astelehenetik izango da operatibo, eta etxetik mugitu gabe, izen ematea, ordainketa eta beharrezko kudeaketa guztia egiteko aukera emango die”.
Zu! zerbitzua aukeratzen dutenek inprimakia eskuratu, eta hura eta aurkeztu beharreko gainontzeko dokumentazio guztia zerbitzuan aurkeztu beharko dute (Herriko plaza 1) astelehen, asteazken eta ostiraletan 07:30etik 15:00etara, eta astearte eta ostegunetan, 07:30etik 20:00etara.
Udalekuak eta kanpamentuak
Udalekuak eta kanpalekuak antolatu ditu udalak aurten ere. Udalekuen barruan, Txikiak eta Udalekuak antolatu dituzte. Bi talde horietan parte hartzeko mugarik ez dago, hau da, izena ematen duten guztiek izango dute tartea, eta hamabost eguneko bi txanda egingo dituzte bakoitzean. Txikiak programan parte hartzeko matrikula 41,30 eurokoa da; Udalekuena, berriz, 51,50 eurokoa. Kanpamentuetan ere bi talde daude, gazteenak Nafarroara joango dira, eta helduenak Lousadara (Portugal). Azken horien matrikula, 206 eurokoa da.
Familia ugariek hobariak izango dituzte, baita seme-alaba bat baino gehiago izena ematen duten familiek. Behar bereziak dituzten haurrei begira, berriz, arreta emateko hezitzaileak kontratatuko ditu udalak.
Udako Oporrak programan aritzen diren begiraleei aipamena egin die Ostolazak, “gazte ugarik hartzen dute parte, hezitzaile talde handia behar izaten dugulako. Hezitzaileen lana, formakuntza eta ardura nabarmendu nahi ditut, eta eskerrak eman egiten duten lanagatik, beraiek gabe ezinezkoa litzatekeelako programa hau aurrera ateratzea”.
Errenterian erroldatutako, eta bertako ikastetxeren batean ikasten duten haur guztiak animatu ditu parte hartzera Udako Oporrak programan, amaitzeko.
