Pasaia Abesbatzak 25. urteurrena ospatuko du Antxon

Antxoko Musika Asteak antolatutako kontzertu sorta baten lehena izango da biharkoa.

olatz mitxelena

2018/03/09

Pasaia Abesbatzak bihar abestuko du elizan, eta datorren larunbatean, Pasaia Txiki abesbatzak.

25 bete ditu aurten Pasaia Abesbatzak eta bihar urteurrena ospatzeko kontzertua eskainiko du Antxoko San Fermin parrokian, 20:30etik aurrera. Imanol Elizasuk zuzenduko du kontzertua, eta koruak kontzerturako propio landutako errepertorioa aurkeztuko du. Pasaia Abesbatzaren kontzertua Musika Banda Pasaiak antolatutako Musika Astearen barruko lehen kontzertua izango da, baina, beste lau kontzertu programatu dituzte, datozen bi asteburuetarako. Igande honetan bertan (hilak 11) bi kontzertu izango dira, lehena Gure Zumardian, 13:00etan, Illunbe Musika Bandaren eskutik, eta bigarrena elizan, 19:00retatik aurrera eta Hirusta abesbatzaren eskutik.

Datorren asteburuan izango dira beste bi kontzertuak, biak San Fermin parrokian. Larunbateko kontzertuan (hilak 17) haurren abesbatzak izango dira protagonistak. Pasaia Txiki Abesbatzak kantatuko du, Granollers-etik heldu den Cor Allegro Amics de la Unio koru katalanarekin batera. Igandean, azkenik, Sugar Ensemble taldearen kontzertu izango da, elizan baita ere, 19:00etatik aurrera. Boskote bat da, ondorengo musikariek osatua: Mikel Albistur (oboe) Nagore Larrion (zeharkako flauta), Iñaki Iraola (fagot), Eider Gaztañaga (tronpa) eta Carlos Noain (klarinetea). Kamera musika interpretatuko dute, garaikidea.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.