[Galeria] VIII. Mariasun Landa Sariketan, 1936ko gerra pairatu zuten emakumeak protagonista

Idoia Fraile Ugaldek eta Iñigo Legorburu Arregik irabazi dute aurtengo lehiaketa.

olatz mitxelena

2018/03/10

Mariasun Landa idazlea aurten ere izan da sari banaketan, eta alkateak eskertu egin dio parte hartzea.

Hunkigarria izan da VIII. Mariasun Landa Sariketa. Gaur eguerdian egin dute, lehen aldiz, Errenteriako udaletxeko pleno aretoan, lehiaketako bi lan irabazleen protagonistak – Pilar Fraile Sarasola eta Kontxi Ruiz Royo- bertan zirela. 1936ko Gerra pairatu zuten emakumeen testigantzak bildu dituzte aurtengo sariketan, eta herriko bi emakumeren historia jasotzen duten bi lan saritu dituzte. Euskaraz Idoia Fraile Ugaldek irabazi du Pilar Fraile Sarasola: leihotik erbesteari begira lanarekin. Gaztelaniaz, berriz, Iñigo Legorburu Arregik irabazi du, Kontxi Ruiz Royo: La guerra vista desde los ojos de una niña idazlanarekin. Emakumeen gerra garaiko testigantzak Errenteriako Udala oroimen historikoa berreskuratzeko lanean ari da, eta horregatik, aurten 1936-1945 garaia bizi izan zuten emakumeen bizi esperientzietara mugatu du urtero Martxoaren 8aren testuinguruan antolatzen duen literatur sariketa. Ekitaldia, gainera, garai hura bizi izan zuten herriko beste hainbat emakumeren testigantzak biltzen dituen ikus-entzunezkoaren proiekziorekin abiatu dute. Tartean zen Miren Mendarte zendu berria, eta alkateak harentzako hitz batzuk ere izan ditu sari banaketan egin duen hitzaldian. Bideo proiekzioa bukatuta, gaurko bi protagonisten historia lazgarrian zentratu da ekitaldia. Gerratik ihesi erbestera jo behar izan zuen Pilar Fraile Sarasolak, hasieran guraso eta anai-arrebekin Bilbo aldera, eta ondoren, Bilbo erortzean, gurasorik gabe, gerrako beste hainbat umeren antzera, La Habana ontzian. Kontxi Ruiz Royo, aldiz, herrian geratu zen familiarekin, eta gerra eta gerra osteko urte latzak betiko markatuko zuten bere haurtzaroa. Gaur egun 85 urte ditu Kontxi Ruiz Royok, eta 90 Pilar Fraile Sarasolak, eta biak Gabierrotako adinekoen egoitzan bizi dira. Beren historiak jasota, horiek zabaldu eta transmititzea da orain erronka, Idoia Fraile Ugaldek sari banaketan esan bezala “haria eten ez dadin”. HITZAk datorren asteko papereko edizioan emango du argitara euskarazko lan irabazlea.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.