[Galeria] Merezitako aitortza

Merezitako aitortza egin zioten larunbatean, Lezon, Agirretxe sendiari. Dultzainaren aro baikorrenaren ezinbesteko zati izan ziren.

Urko Etxebeste

Lezo

2018/03/12

Disko-liburua aurkeztu bitartean, dultzaineroak plazan. Argazkia: Carrera.

Larunbata Agirretxe sendiarena izan da Lezon. Agirretxetarrak: Gipuzkoako dultzainaren testigantza disko-liburuaren aurkezpenaren aitzakiarekin, Lezon erroak dituen familiari aitortza egiteko eguna izan zen herenegungoa. Beste era batera ezin zen egin aitortza hori: musikarekin, dultzainarekin, kalean. Kalea zen Errezilen jatorri duen familiaren DNAren oinarria, ezin baita ulertu Euskal Herrian festa giroko ekitaldiren bat dultzainen doinurik gabe, kaleko doinu horiek gabe. Hala, zeregin horretan, Agirretxe abizenak eman duena ordainezina da. Ordain horren zati bat bederen disko-liburuarekin kitatu dute. Merezita. Udaletxean eman zituzten disko-liburuaren gaineko xehetasunak, eguerdian, Lezoko alkate Jesus Mari Martiarenak, Musika Eskolako zinegotzi Alfredo de la Puentek, Tomas Garbizu Musika Eskolako zuzendari Xanti Espinak, Herri Musikaren Txokoko Juan Mari Beltranek, eta nola ez, familiaren ordezkari modura Joxe Luix Agirretxek. Udaletxeko areto nagusia eskas gelditu zen, jendetza hurbildu zen aurkezpenera. Emozioz bizi izan zuten Agirretxetarren laugarren belaunaldiko dantzari gazteen Agurra. Den-denek goraipatu egin zuten argitalpena, egileak eskertuz. Hala, dokumentazioa eta lan teknikoa Oiartzungo Herri Musikaren Txokoko kideek egin dute —familiarekin elkarlanean—, Juan Mari Beltran buru dutela: hark, lanaren alderdi musikalaz hitz egin zuen, xehetasun teknikoak ere emanez . Errezilgo, Irungo eta Lezoko udalek, berriz, sorkuntza argitaratzeko lanean laguntza eman dute. Izan ere, hori izan baitzen familiaren bidea: jatorriz Errezilgoak, Irunera joandakoak, eta Bidasotik Oarsoaldera (Lezora) zati bat etorri zen, Konstantino Agirretxe zehazki —Eugenio Agirretxe anaia ere dultzainaren urrezko aroaren kudeatzaileetakoa izan zen, Uranzu taldea sortuz Konstantinorekin batera—. Haiei, euren aita eta osaben partetik iritsi zitzaien dultzainarekiko zaletasuna. Agirretxe leinuraren Lezoko ordezkariak, Joxe Luixek, esker on hitzen ondoren, familiaren jatorririk disko-liburuaren egikaritze lanetarainoko errepasoa egin zien pleno aretoa bete zutenei, sorkuntzaren nondik-norakoen berri eman zien. Baita belaunaldiz belaunaldi nola joan ziren Agirretxetarrak bat egiten dultzainarekin, instrumentuaren mundu hori aberasten. Pena azaldu zuen, ordea, haren aita Konstantino eta osaba Eugeniok ez zutela bizirik zirela ezagutu argitalpena. Festa eguna Disko-liburuaren aurkezpena egunaren elementu bat izan zen. Besteak, musikariak, dultzaina, dantza eta kalea izan ziren. Goizean Lezon bildu ziren dultzaina jotzaileek Altamiratik hasita herribira egin zuten, lehenengo elkarrekin, ondoren bi taldetan; dultzaina jotzaileen bi tropelek eguerdi aldean bat egin zuten Gurutze Santuaren plazan, aurkezpena aurretik. Udaletxeko hizketaldien ondoren, plazan, Mutxikoak dultzaina doinuekin, tartean, Agirretxetarren konposizioak zeudela. Bazkaldu aurretik, Larrain Dantza; ondoren, Lezoko Ikastolako jantokian plateren inguruko bilgunea, 60 bat laguneko bazkarian. Arratsaldean ere kalejira egin zuten dultzaina jotzaileek. Bapo joan zen eguna. Ondoko argazkietan, (goizekoak dira, Carrerak HITZArik emandakoak), herriko giroaren lagin bat.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.