Hitzarmena sinatu dute, berriz ere, Lezo, Errenteria, Pasaia eta Oiartzungo udalek, lau herrietako kiroldegietako bazkideek Oiartzun, Errenteria eta Lezoko igerilekuak erabiltzeko aukera izan dezaten.
Markos, Txasko eta Ortega hitzarmenaren berri emateko agerraldian.
Hitzarmena sinatu dute, berriz ere, Lezo, Errenteria, Pasaia eta Oiartzungo udalek, lau herrietako kiroldegietako bazkideek Oiartzun, Errenteria eta Lezoko igerilekuak erabiltzeko aukera izan dezaten. Gaur goizean egin dute agerraldia horren berri emateko, Jon Txasko Errenteriako Kirol zinegotziak, Enekoitz Markos Oiartzungo Kirol zinegotziak, eta Irlentz Ortega Lezoko Kirol zinegotziak, Errenteriako Galtzaraborda Kiroldegiko igerilekuan.
Hitzarmenarekin, Oarsoaldeko herritarrei kirola egiteko erraztasunak eman nahi dizkietela azaldu du Txaskok, “Aurten berritasun batekin gatoz gainera, udaldian, Galtzaraborda eta Elorsoro kiroldegietako igerileku estaliak erabili ahalko dituzte Errenteria, Oiartzun eta Lezoko kirol instalazioetara sartzeko harpidetza orokorra dutenek, eta harpidetza gehi Oarsoaldeko igerilekuetarako plusa duten Pasaiako harpidedunek”.
Gainontzekoan sarrara librea izango dute aurreko baldintzak betetzen dituztenek udazkena, negua eta udaberrian, Galtzaraborda, Fanderia, Elorsoro eta Bekoerrotako igerilekuetan. Harpidetza duten kirol instalazioan geldialdi teknikoa egiten denean ere, erabili ahalko dituzte beste igerilekuak. Beraien harpidetuta dauden instalazioetan ematen ez diren ikastaroetan ere parte hartu ahal izango dute, horretarako dagokion instalazioaren tasa ordainduta. Azken kasu horretan, beti ere, lehentasuna izango dute igerileku horretan harpidetza dutenek-
Herritarrei ematen zaien zerbitzua zabalagoa egiten duela prezioa igo gabe gaineratu du Txaskok: “Oarsoaldeko beste herri batean lan egin edo ikasten dutenek, beren denbora hobeto antolatzeko aukera izango dute; edota eguna eskualdeko beste herri batean bizi diren senideekin igerilekuan eman nahi dutenek horretarako aukera izango dute. Gainera, beste herrietako kirol instalazioak ezagutzeko aukera ere ematen du hitzarmenak”.
Eskualdeko igerilekuak erabili ahal izateko harpidetza orokorraren jabe izan behar dute herritarrek, eta Pasaiaren kasuan, harpidetza orokorra eta Oarsoaldeko igerilekuetarako plusa beharko dute.
