Itsas korronteek ekarriko dute Atlantikaldia

Itsas Korronteak, hori izango du Atlantikaldiak aurtengo ekinaldiaren goiburua. Irailaren 20tik 23ra ospatuko da eta dagoeneko, kultur topagune eta musika jaialdiaren bosgarren aldia osatzeko lanean hasi da Errenteriako Udala.

Ikerne Zarate Gartziarena

Errenteria-Orereta

2018/03/16

Iazko Atlantikaldiaren hasiera ekitaldia.

Itsas Korronteak, hori izango du Atlantikaldiak aurtengo ekinaldiaren goiburua. “Itsas korronteek izaera ezberdinak dituzte, aldakorrak dira, norabide asko dituzte, eraldaketan eta eraldatzen dihardute, elkartu eta banatu egiten dira, gurutzatu egiten dira, mugarik ez dute ezagutzen, mugimendua eta joerak irudikatzen dituzte… baina denak itsaso beraren zati dira eta Atlantikaldiak ere, itsaso horretan eragin nahi du” azaldu dute antolatzaileek. Irailaren 20tik 23ra ospatuko da eta dagoeneko, kultur topagune eta musika jaialdiaren bosgarren aldia osatzeko lanean hasi da Errenteriako Udala. Itsas Elkarrizketak indartu eta Itsas Topalekuak mantenduko dituzte jaialdiaren barruan eta aurten, izenak dion moduan, modu berezian landuko dituzte korronte artistiko ezberdinak: “Estilo eta musika mota ezberdinak plazaratuko dira, eta munduko kultura mugimenduei leihoak zabalduko dizkio aurtengo Atlantikaldiak”. Orain arte bezala, kulturen arteko elkartrukeak ahalbidetuko ditu herriko zein kanpoko eragileen arteko elkarlana bultzatuz. Itsas elkarrizketak Hikuntza, kultura eta jatorri ezberdinetako artistak elkarlanean jarriko ditu Atlantikaldiak aurten ere Itsas Elkarrizketak programaren barruan, “agertokian elkarbizitzen eta jaialdiaren izaera indartzen”. Itsas topalekuak zabalduko dituzte aurten, gainera. Atlantikaldiaren oinarrian jarri du beti udalak parte hartzea, eta aurten ere hala egingo du, “eragileen proposamenek elikatzen dutelako jaialdiaren programazioa. Errenteriarrek ematen diote nortasuna jaialdiari jaialdiari, eta beren parte hartzea sustatu nahian, aurreko aldietan bezala, udalak herritarren proposamenekin osatu eta aberastu nahi du jaialdia”. Horretarako apirilaren 9tik maiatzaren 11ra zabalduko dute proposamenak bidaltzeko epea Atlantikaldiaren webgunean.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.