Euskaraldiari buruzko hitzaldia antolatu dute asteazkenerako
Peio Jauregik gidatuko du saioa, Lasarte-Oriako esperientzia oinarri hartuta.
Peio Jauregi, ‘Ahobizi’ eta ‘Belarriprest’-en iniziatibaren aurkezpenean, Pasai Antxon.
Pasaiako Euskararen Aholku Batzordeak hitzaldi bat antolatu du asteazkenerako EHUko Hezkuntza, Filosofia eta Antropologia fakultateko irakasle Peio Jauregirekin. Pasaiako Euskaraldia antolatzen hasi aurretik, antolatzaileek Jauregiren esperientzia baliatu nahi izan dute, antxotar euskaltzaleak Lasarte-Oriako iniziatibaren prestatze eta sortze lanetan aritu zelako.
Hitzaldia asteazkenean da, 18:00etan, Trintxerpeko alkateordetzan.
Zer da euskaraldia?
Hizkuntza ohiturak astindu eta ohiko harremanetan euskara gehiago erabiltzeko ariketa bat izango da Euskaraldia. 2018ko azaroaren 23tik abenduaren 3ra bitartean egingo da, Euskal Herri osoan, eta euskaraz hitz egiten edo ulertzen duten guztien arteko ariketa kolektiboa izango da.
Euskal Herri osoan eta elkarrekin euskaraz arituta, egunerokoan eragitea da asmoa. Horretarako, ‘ahobizi’ eta ‘belarriprest’ figurak erabiliko dira, orain arte hainbat tokitan egin den moduan. Antxon, asteburu honetan egin dute lehen entsegua.
Pasaiako Euskararen Aholku Batzordeak hitzaldira gonbidatu eta Euskaraldiaren herriko antolakuntzan parte hartzeko gonbidapena luzatu du.
