[Galeria eta bideoak] Aldaketaren protagonistak, 'Mater' ontziaren brankatik

Oiongo ikastolako ikasleak aritu dira gaur plastikozko hondakinen arratzen, EkoFish kanpainaren barruan, 'Mater' itsasontzian;

olatz mitxelena

Pasaia

2018/03/22

Goizeko 10:30ak dira eta San Pedroko kaian ezohiko mugimendua igartzen da. Mater itsasontziari kea dario, laster itsasoratuko denaren seinale, eta halako batean algarak entzun dira. Oiongo Ikastolako DBHko ikasle talde bat da, txangoan Pasaiara iritsi berria, Ekofish 2018 kanpainaren barruan lantzen ari den proiektuaren zati bat gauzatzera propio etorria. Hezitzaileek harrera egin diete ikasleei kaian, eta bi taldetan banatu dituzte. Talde bat lehorreko lana egitera joan da, Alabortzara, eta bestea Mater itsasontzira, plastikozko hondakinak arrantzatzera. Bueltakoa egingo dute ondorenean, itsasoan ibilitakoak lehorrean eta alderantziz. Klasean aurrez landutakoa bertatik bertara ikustea, horixe gaurko xedea. Ontziratu eta berehala hasi dira aurkezpen eta azalpenak. Itsasontzi museoa ikusi, segurtasun arauak errepasatu eta konturatzerako itsasoratzen ari da Mater. Pozik ikasleak, bokalera begira, begiak zabal-zabal. Ederra dago ingurua, eguzkia, hotza, eta postala biribiltzeko, elurra Aiako Harrian. Bokalera hurbildu ahala, ordea, hasi da mugimendua barkuan. Iragarritakoa baino itsaso gehiago dago, olatuak 1,5 metro ingurukoak, eta barkua dezente mugitzen da. Nahi baino lehen hasi dira lehen zorabioak. Eta ezinegonari aurre egiteko onena, lanari ekitea. Hasi dira jarduna banatzen hezitzaileak, eta hiru taldetan banatu dituzte egitekoak: behaketa taldea, arrantza taldea, eta sareen taldea. Bakoitzak bere ardura zehaztua du ezohiko arrantzari ekin baino lehen. Itsas hondakinen lerroa

Oiongo ikastolako ikasleak, ‘Mater’ itsasontzian, plastikozko hondakinen arrantzan

Bi eta lau milia nautiko artean kokatzen da adituek itsas hondakinen lerroa deitzen dutena, bertan pilatu ohi delako plastiko gehien, eta hara zuzendu da Mater. Bokalearen kanpoaldean dagoen buia milia batera dagoela jakinarazi du hezitzaileak. Hura zeharkatu berri du ontziak, eta aurrera doa, plastiko hondakinen bila. Trapaila dago eta ez da erraza plastikoa begiztatzea, baina bilatu bitartean ikasleek badute zereginik. Txamarta nola bota ikasi, sokarekin asto-belarriak egin, sareak nola uretaratu eta jaso, eta bat-batean iritsi da albistea: “Plastikoa, plastikoa…!”, entzun da brankatik, eta ababorretik pilatutako xalabardoen laguntzaz hasi dira saiakerak. Ez da erraza, baina hainbat saiakeraren ondoren lortu dute. ETB dago barkuan, eta ikasleek, pozik ematen diote kamera aurreko kazetariari arrantzatutakoaren berri. Itzulera, portuan zain direnen bila Denbora azkar doa aurrera eta konturatzerako iritsi da porturatzen hasteko ordua. Mater-ek itzulia egin du, eta parez pare, Jaizkibel eta Azabaratza, Donostia, Ulia eta Platako Farola. Uraren Nazioarteko Eguna da gaur, eta ospakizunarekin ondo lotzen da gaurko esperientzia. Gazteek badakite, eta argi dute, aurtengo Ekofish kanpainak dioenaren haritik, beraiek direla “aldaketaren protagonistak”. Lana, hala ere, ez da dute bukatu. Gauzatze fasea dute oraindik egiteko, etxera bueltan. Eta zer kontatu, gaur behintzat, ziur izango dutela.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.