Jantziaren Zentroak erakusketa iraunkorrean zituen jantziak aldatu ditu, eta bihar zabalduko du bigarren erakusketa finkoa. Jatorrizko 30 jantzi bildu ditu, oraingoan, bi aretotan banatuta.
30 jantzi berri ikus daitezke Jantziaren Zentroan.
Jantziaren Zentroak erakusketa iraunkorrean zituen jantziak aldatu ditu, eta bihar zabalduko du bigarren erakusketa finkoa. Jatorrizko 30 jantzi bildu ditu, oraingoan, bi aretotan banatuta. Herri Jantziak aretoan, hamabost jantzi bildu dituzte, gehienak dohaintzan emandakoak dira, eta haien inguruko dokumentazio ugari bildu du dantza taldeak. Besteak beste, Raimundo Arbide Sorondo (Errenteria, 1858-1936) zinegotziaren jantzia, doluzko gizon jantzia (Sara, Lapurdi), edota Neguriko (Gerxo, Bizkaia) 1920. urteko iñude jantzia.
Jantzien Bilakaera izeneko aretoan beste hainbeste jantzi erakutsiko ditu Iraultzak, tartean, 1920. urteko Madrilgo haurtzain jantzia eta 1903. urteko Lapurdiko emakume jantzia. Azken horrek, gona eta hiru gerruntze ditu, egunaren une jakin bakoitzean janzteko arropa, goizerako, arratsalderako edo gauerako gerruntzea.
Bigarren erakusketa finkorako, paperezko ile ordeak egin ditu Jantziaren Zentroak, manikiek soinean daramaten jantzien garaiko orrazkera dutenak.
Balorazio baikorra
Urtebeteko ibilbidearen gaineko balorazio baikorra egin du Jantziaren Zentroak. Denbora horretan 1.400 bisitari izan ditu, gehienak emakumeak eta 35-55 urte artekoak. Gehienak Errenteriakoak edota Oarsoaldea eskualdeko gainontzeko herrietatik etorritakoak.
Ikasturte berriarekin batera, ikastetxeentzako bisita gidatuak prestatu ditu Jantziaren Zentroak: “13-15 urte arteko hainbat talde pasa dira bertatik eta ikasle zein irakasleek balorazio ezin baikorragoa egin dute”. Modan eta joste lanetan adituak diren pertsonak ere izan dira Jantziaren Zentroan, Kutxa Kulturreko diseinatzaile berriak, eta Donostiako AEG moda eskolako ikasleak esaterako . Azken horiek jantzien kalitatea eta aberastasuna nabarmendu dute.
Hamabi hilabeteko ibilbidean gainera, Gipuzkoako Foru Aldundiko Gordailuarekin hitzarmena egin du Iraultza Dantza taldeak bere bilduma bertan, “baldintza ezin hobetan” gordetzeko. Jantziaren zentroa asteburuetan eta jai egunetan dago zabalik: larunbatetan: 11:00etatik 14:00etara eta 17:00etatik 20:00etara; igande eta jai egunetan, 12:00etatik 14:00etara. Aste Santuko jai egunetan goizetan izango da zabalik, beraz, 12:00etatik 14:00etara. Bisita gidatua egin nahi izanez gero, Errenteriako turismo bulegoan eman behar da izena 943 49 45 21 telefono zenbakira deituta edo
posta elektronikora mezua bidalita.
