Loteria Primitiboak ia milioi eta erdi euroko saria utzi zuen Lezon osteguneko zozketan. Irabazlearen pistarik ez dago oraindik. Poztasuna, ordea, edonon.
Loteria administrazioko arduradun Guadalupe Mujika Garmendia.
Lezon ez dago ia hitz egiteko beste gairik. Osteguneko Loteria Primitiboaren sari bakarra Lezoko lehen administrazioan, Donibane kalean dagoena, zigilatu zuten. Sei zenbaki asmatuta (denak
reintegro izeneko zenbakia izan ezik), 1.448.062 euro irabazi zituen, ziurrenik, lezoar batek —nostalgikoentzat: ia 241 milioi pezeta—. Zenbaki osagarria asmatuta, 11,3 milioikoa litzateke saria. Eta administrazioko arduradun Guadalupe Mujika Garmendia pozarren dago, pozez zoratzear. Irribarrea ezin kendu dabil.
Ez daki nork eraman duen saria. Lezoarra izan daitekeela dio, baina baita kanpokoa ere, izan ere, zehaztu du portuko langileak ere joaten direla Donibane kaleko dendara zortearen bila, baita Errenteriako eta Pasai Donibaneko biztanleak ere. Lehengo astean, bertara oporretara etorritako kanpotarrak ere izan ziren boletoak zigilatzen… Irabazleen abanikoa asko zabaldu du, esandakoekin, Mujikak.
Horregatik, HITZAk ez du izan tentaziorik “Nork irabazi du saria?” bezalako galdera zuzenik egiteko, balizko irabazlearen azalpenean garbi adierazi duelako loteria saltzaileak Lezoko 6.000 biztanleetako bat izan daitekeela, edo ondoko herrietako nahiz kanpoko besteren bat. Eta irabazlea nor den jakingo balu ere, ondo egiten du ez esaten; norberak nahi duen erara bizi dezala milioi eta erdi eurok eman dezaketen zoriontasuna. Baina datu bat konfirmatu egin du: oraingoz ez zaiola inor ere joan pastak edo xanpaina ematera, zortea banatzearen truke.
Poztasuna
Gaur eguerdian egon da OARSO BIDASOKO HITZA Donibane kaleko establezimenduan. Jendearen joan-etorria, izugarri handia. HITZA Mujikarekin hitz egiteko zain egon den bitartean, hiru, lau, bost pertsonako ilarak izan dira etenik gabe. Eta bezero ia guztien ahotan, saltzaileari eskainitako zorion esaldia, irribarrea, eta desioa. “Ea niri tokatzen zaidan” entzun ahal izan da behin baino gehiagotan. Jendea pozik dago. Eta loteria dendako arduradunak aitortu duenez, gaur, bezero berriak ere etorri dira; “hamahiru euro hauekin egidazu nahi duzun loteria”, esan dio bezero batek lezoarrari. Loteria saltzaile eta poztasun banatzaile bakarrik ez; zortearen ikur bilakatu da Guadalupe Mujika Garmendia. Aste Santua tartean, aste arraroa dela adierazi du irribarrea kendu ezinik dabilen lezoarra, “sari potolo bat eman dugunez, orain jendea zain dago ea besteren bat iritsiko ote den…”.
Hogei urte daramatza zortearen saltokian lanean Mujikak; arratsaldetan lan egiten duen haren lankideak, hiru. Behin ere ez du eman gisa horretako saririk, “txikiagoak eman ditugu. Adibidez, larunbat bateko ohiko loteriaren zozketan bigarren sari bat eman genuen, orain dela zazpi bat urte edo. 2000. urtean Bonolotoaren sariren bat ere eman genuen, ez dut ondo oroitzen zenbatekoa, baina ziur oraingoa baino askoz txikiagoa izan zela. Horrelakorik, behin ere”.
Zurrumurruen zentral antzekoa bilakatu da Donibane kaleko zonalde hori, loteria administrazioaren kanpoaldea batez ere. “Nori tokatu ote zaio?”, “Norentzat izan ote da hainbesteko zoriontasuna?”, “Zer egingo du diruarekin? Niri emango balit zati bat, nik esango nioke zer egin!”… Horiek herritarren hainbat esan gaur eguerdian. “Herri erdia, beste erdiari begira ari da, ea Loteria Primitiboa haiei tokatu zaien jakiteko”, esan du, barrezka, Mujikak.
Zortzi apustuko boleto bategatik, 16 eurokoa, ia milioi eta erdi euro. “Niri tokatu izan balitzait ez nioke inori esango”, aitortu du Guadalupe Mujikak. Baina esan gabe ere, kontziente da oso pertsona batek, familia batek edo lagun talde batek (nork daki), erosoago bizitzeko aukera izango duela baldin eta ganoraz erabiltzen badu dirutza hori.
Sariaren berri izan eta berehala, lezoar askok hots egin zioten Guadalupe Mujikari. 200 kideko lagunarte edo peña dute saltokian, eta deietako batzuk bertako kideenak izan ziren. Saltzaileak ez du esan, baina HITZAk sumatu du (oker badago barkamena aldez aurretik) beharbada nahiago lukeela pertsona bati baino, saria gehiagori banatu izana, peñako kideei adibidez. Hala izango da, berandu baino lehen gainera. Mujika: “Hemen lan egiten dugun guztiok hori nahi dugu, sariak eman”.
