Euskaldarrak elkarteak antolatuta datorren astelehenean hasiko da elkarte gastronomikoen arteko txapelketa hogeita hamahirugarrenez, eta Oarsoaldeko hogeita lau elkarte gastronomikok hartuko dute parte.
Euskaldarrak elkartearen aurreko erakusketa batean sukaldatzen
Erakusketa Gastronomikoa ate joka dator. Euskaldarrak elkarteak antolatuta datorren astelehenean hasiko da elkarte gastronomikoen arteko txapelketa hogeita hamahirugarrenez, eta Oarsoaldeko hogeita lau elkarte gastronomikok hartuko dute parte: Errenteria-Oreretako hamasei, Pasaiako lau, eta Oiartzun eta Lezoko bina. Parte hartzeko oinarriak ez dira aldatu, eta bertan arituko direnak ezingo dute sukaldari profesionalak izan. Profesionalak ez, baina maisuki arituko dira kazola artean zapore festa zabaltzen Migel Alduntzin kalean kokatutako elkartetik.
Ez dute lan erraza izango, elkarte guztietako ordezkariek, platerik berezienak prestatzen saiatzen direlako erreferentziazkoa den hitzordurako. Datorren astelehenean (hilak 9) hasiko da hamabostaldia, eta Errenteria-Oreretako Hermanos Camino eta Ostarte, eta Lezoko Altzate izango dira sukaldean; asteartean, Txintxarri, Bukagaitz eta Batasuna, hirurak errenteriarrak, izango dira mostran; asteazkenean, berriz, Alkartasuna, Bi Errota eta Lagunak izango dira protagonistak, azken horiek ere Errenteriakoak; astea amaitzeko, errenteriako Landare, Niessen eta Ondarra elkarteak izango dira kozinatzen.
Asteburuan etena izango du hamabostaldiak, baina hilaren 16an itzuliko da. Lezoko Ixkulin, Errenteria-Oreretako Arditurri, eta Oiartzungo Bizardia izango dira Euskaldarraken egun horretan. Hilaren 17an, asteartea, berriz, Euskaldarrak eta Beraun bera (Errenteria) eta Aldeguna (Oiartzun) elkarteen txanda izango da; hilaren 18an, Pasaiako La armonia, Yola eta Itsas Mendi arituko dira; eta hamabostaldia amaitzeko, hilaren 19an, Lore Txorta (Pasaia), Gau Txori eta San Huberto (Errenteria) arituko dira.
Lanak eginda, epaimahaiaren esku geldituko da irabazlea erabakitzea. Hilaren 21ean (larunbatarekin) jakinaraziko dute mostraren amaiera afarian. Sei sari banatuko dira guztira. Irabazleak Mikelazulo garaikurra irabaziko du; bigarren sailkatzen den elkarteak, Errenteriako Udalak emandako saria jasoko du; hirugarrenak, Lekuzaharra tabernak emandakoa; eta laugarrenak, berriz, Aralar tabernak eskainitako saria. Sari berezia jasoko du kalitate-prezioa harreman onena duen platerak, De Cyne Reynak emanda; eta Elkartearen Plater Berezia sarituko dute Maria Antonia Zapirainek emandako garaikurrarekin.
