Auzo batzarren dinamikari ekingo dio udalak

Batzar horietan jasoko duten informazioa balio handikoa izango dela esan du udalak, "neurri handi batean, udal honek bere egiten dituelako espazio horietatik ateratzen diren eskaera eta proposamenak".

Ikerne Zarate

Errenteria-Orereta

2018/04/06

Galtzarabordan aurreko agintaldian egindako auzo batzar bat.

Auzo batzarrak egingo ditu hilabete honetan hasi eta ekainera bitartean udalak. Julen Mendoza alkatea eta Bernar Lemos Hirigintza zinegotziak hartuko dute parte udalaren izenean bilera horietan, eta batzuetan Jose Cruz Legorburu Ingurumen zinegotziak, Nagore Basurto Gizarte Zerbitzutako zinegotziak, eta Jon Collar Kultura zinegotziak ere hartuko dute parte. Batzar horietan jasoko duten informazioa balio handikoa izango dela esan du udalak, “neurri handi batean, udal honek bere egiten dituelako espazio horietatik ateratzen diren eskaera eta proposamenak”. Batzar ireki horietan azken bi urteetan egindakoaren berri emango die udalak auzotarrei, eta azken horien ekarpen eta proposamenak jasoko ditu, gainera. Datorren astean izango dira lehen bi bilerak, Galtzaraborda eta Zamalbide auzoetan. lehenengoan, asteazkenean (hilak 11) izango da batzarra 18:00etan hasita Galtzarabordako Gure Leku Auzo Elkartearen egoitzan; Zamalbide auzoko batzarra, ostegunean izango da (hilak 12), Zamalbide Auzo Elkartean.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.