Herriko Plaza txiki geratu zaie beste behin pentsiodunei
Hamarnaka herritar elkartu ditu gaur goizean Duintasunaren hileroko manifestazioan.
Duintasunak deituta kalera atera dira beste behin hamarnaka herritar, pentsio duinak aldarri. Hileroko lehen astelehenarekin egin ohi duten legez Herriko Plazan elkartu dira gaur erretiratuak, 11:00etan, eta Duintasuna elkarteko ordezkariek eskualdeko udal guztietan aurkeztu dute mozioa irakurri dute plazara bildutako jendetzaren aurrean.
Beren aldarrikapen nagusiak biltzen ditu aipatu mozioak. Azaldu dutenez, mozioaren bitartez alderdiek beren jarrerak azalaraztera behartu nahi izan dituzte. Mozioak ez dituzte oraindik udal guztietan eztabaidatu, baina bai ordea, Errenteria-Oreretan. Bertan mozioak aurrera egin zuen EH Bilduren eta Irabaziren babesaz. PSE-EE et EAJ, baina, abstenitu egin ziren.
Hurrengo deialdiak
Pentsiodunen ordezkariek esan dutenez “harro” daude beren deialdiak izaten ari diren erantzunarekin, eta borrokara batzeko gonbidapena luzatu dute, mobilizazioetan bezala, haien antolakuntzan.
Manifestazioan irten aurretik datozen deialdien berri ere eman dute. Iragarri dutenez Espainiako estatuko koordinadorak hilaren 16rako egin duen deialdiarekin bat egingo dute, “beren aldarrikapenekin bat” datozelako. Honenbestez, elkarretaratzeak iragarri dituzte egun horretarako, 11:00etan, udaletxeen aurrean. Pasaiakoa Trintxerpeko alkateordetzan izango dela zehaztu dute baita ere.
Azkenik, hurrengo manifestazioa maiatzaren 7an izango dela jakinarazi dute, eta aurreratu dute datorren hilabeterako beste deialdi bat lantzen adi direla herrialdeetako koordinadorekin elkarlanean.
