Lonjaren kontrako prozedura penala artxibatuko dute

Instrukzio epaitegiak ez du deliturik atzeman, diru publikorik ez dela desbideratu frogatu eta gero.

olatz mitxelena

2018/04/11

Ustelkeriaren kontrako fiskaltzak agindu zuen polizia operazioa, eta miaketetan aritu ziren lonjako lanetan eta Portu Agintaritzan. Dokumentazio ugari eraman zuten bertatik.

Lonjaren kontrako prozedura penala artxibatu egingo dutela jakinarazi du Portu Agintaritzak, esan dutenez, instrukzio epaitegiak ez duelako gertatutakoetan deliturik ikusi. Gaineratu dutenez, atzo ezagutu duten autoan, diru publikoa ez dela desbideratu frogatutzat eman dute. Autoan azaltzen denez, irregulartasun administratiboak atzeman dituzte, baina justifikatuta daudela iritzi diote, lanak “interes publikokoak” izanagatik eta “irregulartasun horiek arrain enkantearen jarduera ez etete arren egin zituztelako”. Horrez gain, aurrekontu eta esleitutakotik gora ordaindutako diru kopuru guztiak egindako obra handiagoagatik izan direla ebatsi dute, eta egindako obra gehigarriak exekuzioan agertutako beharrei erantzuten dietela gaineratu. Gauzak honela autoa irmoa den momentuan kasua artxibatuko dutela iragarri du Portu Agintaritzak. Lanak 2015. urtetik geldirik Pasaiako lonja berria eraikitzeko lanak geldirik daude 2015. urte bukaeratik. 2016. urteko apirilean, Macarena Olonak, Espainiak EAEn duen abokatu nagusi eta Portu Agintaritzako administrazio kide zenak, 7 milioi euroko gainkostuak salatu zituen Gipuzkoako Fiskaltzan, eta urte bereko maiatzean Fiskaltzak berak jarri zuen salaketa Olonaren salaketari bide emanez. Guardia Zibila ere sartu zen Portu Agintaritzara dokumentazio bila, 2016ko ekainaren 14ean, operazio ikusgarrian. Iaz, baina, Espainiako Estatuko Kontu Auzitegiak lonjaren gaineko diligentziak artxibatzea erabaki zuen, eta Fiskaltzak, aurtengo martxoan jarduketen largestea. Portu Agintaritzaren arabera, auto honekin “eraikuntza-enpresa eta ikertutako teknikarien irudia negatiboki kaltetu duen prozedura bati amaiera ematen zaio” Bien bitartean, baina, lanak geldirik jarraitzen dute eta pasaitarrak urbanizazio lanen bigarren faseari ekiteko zain.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.