Intxaurrandietak eta Errazkinek ez dutela deliturik egin esan du Lezoko taldeak, "bi agintariek, herriarengandik jasotako agindua bete baino ez zuten egin, eta hori ez da delitua, hauteskunde programa betetzea baizik".
Errazkin eta Intxaurrandieta, larunbateko manifestazioa bitartean.
Ainhoa Intxaurrandieta eta Iñaki Errazkini babesa eta elkartasuna adierazi die Lezon Ondo Ai Ginen taldeak. Intxaurrandieta Gipuzkoako Hondakinen Kontsortzioko (GHK) lehendakari ohia, eta Errazkin Ingurumen diputatu izandako azpeitiarra Madrilgo Kontu Auzitegian epaituko dituzte gaur. Egungo GHK-k jarritako salaketa aztertuko dute, 2013an errauste plantaren lanak geldiarazteagatik. Intxaurrandieta eta Errazkini errauste planta geldiarazteak sortutako kalte ekonomikoak, 40 miloi eurotik gora, bi auzipetuek bere gain hartzeko eskatu du GHK-k.
Intxaurrandietak eta Errazkinek ez dutela deliturik egin esan du Lezoko taldeak, “bi agintariek, herriarengandik jasotako agindua bete baino ez zuten egin, eta hori ez da delitua, hauteskunde programa betetzea baizik”. EAJ eta PSE-EEren jarrera arbuiatu du Lezon Ondo Ai ginenek, eta “beren negozioak” babesteko edozer egiteko prest izatea leporatu die, “noraino iristeko prest dauden erakutsi dute. Izan ere, gipuzkoar guztiontzat ekonomikoki kaltegarria, eta Donostialdeko milaka herritarren osasunarentzat arriskutsua den erruste planta gelditzeagatik epaituko dituzte Intxaurrandieta eta Errazkin, jakinik gainera, egindako zigor eskaera inolako pertsona arruntak ezin duela bere gain hartu”.
EAJ eta PSE-EEren proiektu estrategikoen aurka egiten dutenei “larrutik ordainaraztea” dela epaiketaren helburua argi du taldeak, “horrelakorik berriro egiteko ausardiarik izan ez dezaten. Bestelako eredurik nahi duten herritarrek hauteskundeak irabazita ere, milaka miloiko zorra dakarten proiektu kutsakorrak eta alferrikakoak izan arren, negozio horiek ukiezinak eta beharrezkoak direla frogatu nahi dute; eta hala, negozio horiek oztopatzen dituen oro bortizki zigortuz, min gehien egiten duen moduan, arlo pertsonalean eta guztion osasunaren kaltetan”.
Bi auzipetuei elkartasun osoa adierazi die Lezon Ondo Ai Ginen taldeak, bereziki Lezokoa den Intxaurrandietari eta
herrian bertan zein Gipuzkoan deituta dauden ekimenekin bat egitea eskatu die herritar guztiei.
