Bihar jokatuko dute sailkapen estropada, eta finalak igandean izango dira. Sanjuandarrak nagusi izan dira batelen ligako zortzi kategorietako lautan.
Gipuzkoako Batel Txapelketa jokatuko da asteburuan badian
Batelen denboraldia azken txanpan sartu da. Ontzi txikienen liga bukatu berritan, Gipuzkoako eta Euskadiko txapelketak dira geratzen diren zitak. Herrialdekoa izango da lehenengoa, bihar arratsaldean hasita. Sailkapen estropada jokatuko dute Pasaiako badian, 16:30ean hasita. Biharamunean izango dira finalak, goizez: arraunlariak 10:00etan hasiko dira bogan.
Larunbateko sailkapen estropada erlojupekoa izango da, bi kalerekin; igandeko finala, berriz, ohiko lerroko estropada, lau kalerekin. San Juan-Koxtapek antolatu ditu.
Gipuzkoako Txapelketa jokatuta, Euskadikoak jarriko dio ginga batelen denboraldiari. Hurrengo asteburuan —hilaren 21 eta 22an— jokatuko dute. Ez da itsasoan izango, arraunlariak Arabara joango baitira, Legutioko Urrunaga urtegian lehiatzera.
Sanjuandarrak nagusi
Batelen Gipuzkoako Liga pasa den asteburuan bukatu zen, Getarian, eta sanjuandarrek paper nabarmena —bikaina ez esateagatik— jokatu dute ligan zehar.
Zortzi kategorietatik lautan nagusitu dira arrosak. Gizon seniorren kategorian batel indartsuena izan da San Juan-Koxtaperena, Donostiako Kaiarribak eta Zarautzek jarraituta, hurrenez hurren. Neska seniorren kategorian ere sanjuandarrak izan dira garaile. San Juan A eta B ontziak izan dira azkarrenak, eta Ur Kirolak-entzat izan da hirugarren postua. Hibaikako batela laugarren izan da.
Baina kategoria nagusienetan soilik ez dira ongi baino hobeto aritu. Gazteen Maila femeninoan baita ere sanjuandarrek irabazi dute, Tolosaldea eta Orioren aurretik, hurrenez hurren, eta Kadete mutilen B ontziak ere irabazi du bere kategorian, Orio eta Zumaiaren aurretik.
Haurren Mailan, berriz, San Juan Koxtape Arraun Elkarteko neskek ligako hirugarren postua lortu dute, Tolosaldea eta Orioren atzetik. Beraz, pozik geratzeko moduko liga egin dute klub arrosakoek.
