Kontuak kontu, errenta aitorpena euskaraz egiteko deia egin dute
Iaz oiartzuarren %36,17 egin zuten errenta aitorpena euskaraz; kopuru hori igo nahi dute, oiartzuarren hiru laurden euskaldunak baitira.
2017ko errenta aitorpena egiteko kanpaina hasi da. Oiartzunen, aurten ere bai, Ogasunarekiko betebeharra euskaraz egiteko deia egin dute Oiartzungo Udalaren Euskara Zerbitzuak eta Ttur-ttur Euskaltzaleon Bilguneak. UEMArekin batera ari dira kanpaina horretan lanean.
Iaz, oiartzuarren %36,17 izan ziren errenta aitorpena euskaraz egin zutenak. Duela bi urteko datuekin alderatuta, beherakada txiki bat izan du, %0,44 jaitsi baitzen. Hala ere, 2004tik errenta aitorpena euskaraz egiten duen oiartzuarren kopurua asko igo da; urte hartako datua %6,2
Hazteko tartea
Kopurua mantentzen den arren, oraindik herritar asko dira diru kontuak gazteleraz egiten dituztenak. Horiei bereziki dei egiten diete, errenta aitorpena euskaraz egin dezaten. Izan ere, kopurua hazteko marjina oraindik badago: EUSTATen arabera, oiartzuarren %73,9 da euskalduna, eta %16 ia euskalduna. Kanpainaren bultzatzaileek gogorarazi dutenez, gero eta gehiago dira autolikidazioa etxean jasotzen dutenak. “Horregatik, bereziki nabarmendu nahi dugu autolikidazioa euskaraz jasotzea eska dezakeela herritarrak, inolako arazorik gabe”, gaineratu dute. Aurten ere hainbat euskarri jarriko dituzte, herritarrak anima daitezen. Finantza erakundeek eta aholkularitza eskaintzen dutenak kanpaina babesten dutela jakinarazi dute. Eskerrak eman dizkiete Laboral Kutxa, Kutxabank, Nafarroako Rural Kutxa, Sabadell Guipuzcoano, La Caixa, BBVA, Lurgintza nekazarien kooperatiba eta Zubillaga aholkularitzari, babesagatik. Errentaren kanpaina ekainaren 30era arte luzatuko da. Beraz, orain arte egin ez dutenei pauso hori ematea eskatu diete, eta eman dutenei, bere horretan jarraitzeko.
