Ez daude amore emateko prest

Kalea hartu dute gaur ere Duintasunak deituta hamarnaka pentsiodun eta jubilatuek.

2018/04/16

Duintasunearen elkarretaratzea Espainiako Estatuko pentsiodunen Koordinadorak egindako deialdiarekin bat eginez.

Kalea hartu dute gaur ere Duintasunak deituta hamarnaka pentsiodun eta jubilatuek. Espainiako Estatuan pentsiodunen koordinadorak egina zuen deialdiarekin bat egin du Duintasunak. Ez daudela amore emateko prest esan dute, eutsi behar diotela eta hortzak erakutsi egungo pentsiodunen egoera larria delako, baina are larriagoa izango delako belaunaldi gazteen etorkizuna, “ez dakigu zerbait lortuko dugun edo ez, baina eutsi egin behar diogu, pentsioak zein osasuna babesteko sistema giltzarria direlako geratzen zaiguna duintasunez bizitzeko”. Gipuzkoan 184.630 pentsiodun daude, eta horietatik, 40.228k 600 euro baino gutxiago kobratzen dituzte hilabetean. Pentsiodun eta jubilatuen ongizatea baino garrantzitsuagorik ez dago gaur egun Duintasunaren ustez, “gure eskaerak, bizitza duina izateko eskubidea lortuko baditugu, gure lana eta Eusko Jaurlaritzaren borondate politikoa beharrezkoak dira”. Ordu erdiko elkarretaratzea egin dute Herriko plazan eta mikrofonoa zabalik utzi dute bertaratutakoen iritziak zabaltzeko. Hitza hartu duen pentsiodunetako batek agerian utzi du Madrilgo gobernuaren “faltsukeria”, “dirurik ez dagoela diote pentsioak ordaintzeko, baina badute dirua ordea jendea hiltzeko erabiliko diren armak erosteko. Lotsagarria da”. Hurrengo hitzordua ere egin du Duintasunak. Maiatzaren 7an elkartuko dira Herriko plazan 11:00etan, eta ozen esango dute ez dutela onartuko 1.080 eurotik beherako pentsiorik, euskal gizarte segurantza sistema aldarrikatzearekin batera. Hitzorduarekin bat egitera deitu dituzte herritar guztiak, “pentsioena ez delako gure arazoa soilik, gure seme-alabena, bilobena ere bada, eta guztioi dagokigu borrokatzea nahi duguna, duin bizitzeko beharrezko duguna lortze aldera”.

Azken berriak

Harpidetu zaitez gure buletin irekira!
Astekarko eduki nagusiak, asteko albiste ikusienak, martxan ditugun zozketa eta egitasmoak, asteburuko egitarauen agenda eta askoz gehiago!
Ostiralero zure posta elektronikoan.