Agerraldira deitu dute gaur arratsaldean Touringeko Futbol Eskolako gurasoek. Ostegunari begira jarri dira, orduan eztabaidatuko baita zentsura mozioa.
Touring Berria plataformaren aurkezpen ekitaldia joan den hilabetean.
Agerraldira deitu dute gaur arratsaldean Touringeko Futbol Eskolako gurasoek. Fanderiako futbol zelaiaren harmailatan argazki handia egin nahi dute, eta horren bidez,
Touring Berria plataformari babesa erakutsi. Nahasita datoz urak Touring Kirol Elkartean, eta ostegunean
zentsura mozioari aurre egin beharko dio egungo zuzendaritzak. Touring Berria plataformak aurkeztu du zentsura mozio hori kirol elkarteak bizi duen egoera korapilatsuaren aurrean. Gainbehera gelditu nahi dute plataformako kideen esanetan, elkartea lehengoratu, eta bazkide, jarraitzaile zein jokalarien ilusioa piztu. Zuzendaritzaren dimisioa eskatu zuen zentsura mozioa aurkeztu behar ez izateko, baina egungo lehendakariak,
Paco Arrillagak, argi adierazi zuen ez zuela inongo asmorik dimisioa aurkezteko.
Touring Berria plataformak joan den hilabetean aurkeztu zuen bere burua, baita elkartea hauspotzeko oinarrien berri eman. Emakumeen futbola sustatu, euskarari tarte zabala eman, eta elkartea bera beste eredu batekin kudeatu nahi du bazkide eta jarraitzaileek osatutako plataformak, eta horretarako zuzendaritza batzordea osatzeko izen zerrenda ere eman zuen ezagutzera hilabete hasieran. Zentsura mozioa ostegunean aztertuko dute Reina aretoan egingo duten ezohiko batzarrean. Bazkideak baino ezingo dute bertaratu. Bertaratutako bazkideen bi herenen babesa lortzekotan Touring Berriak proposatu duen zuzendaritzak hartuko luke elkartearen gidaritza. Horretarako baina, ostegunera arte itxaron beharko da. 20:00etan hasiko da batzarra, eta luze joango dela aurreikusi daiteke, egungo zuzendaritzak eta Tourig Berria plataformako kideek beren proiektuak aurkeztu eta babesteko tartea izango dutelako lehenik eta ondoren, bazkideen galderak helduko direlako. Azalpenen ostean helduko da bozkatzeko unea, eta orduan jakingo da baloia nork sareratu duen.
Momentuz, futbol eskolako hainbat gurasoen babesa jasoko du gaur arratsaldean plataformak. 18:45ean egingo duten agerraldian, adierazpena irakurri eta zenbateko babesa jaso duten gurasoen artean jakinaraziko dute.
