Datorren urtean hasiko dira Hospitalilloko adinekoen etxea eraikitzeko lanak
Gaur aurkeztu dute Adinberri proiektua, Ziriza etxean;
Trintxerpeko Ziriza etxean aurkeztu dute gaur goizean AdinBerri egitasmoa, eta bertan eman dituzte Hospitalilloan eraikiko dute adinekoen zentroaren gaineko xehetasunak.
Aurkezpenean Markel Olano diputatu nagusia egon da, eta Olanoarekin batera, Eusko Jaurlaritzako Osasun sailburu Jon Darpon eta Pasaiako alkate Izaskun Gomez, esparruko beste hainbat aditurekin batera.
Pasaian eraikiko duten adinekoen zentroa “AdinBerriren bihotza” izango dela esan dute aurkezpenean. 4.747 metro karratuko eremuan eraikiko dute azpiegitura, eta bertan kokatuko dituzte “zahartzaroari eta mendekotasunaren arretan erreferente izango den zentroa, arreta zentroa eta berrikuntza unitatea barne”.
Azpiegiturak, guztira, 120 plaza izango ditu, 25 babestutako apartamentu eta eguneko zentroa.
Berrikuntza unitateak, berriz, 500 metro karratu hartuko ditu, eta ikerketa eta frogetarako eremuak izango ditu.
Nabarmendu dutenez, eskainiko dituen zerbitzuak “berritzaile eta aurreratuak” izango dira, “pertsona erdigunean duen arreta eredua garatuko” dutelako, “erabiltzailea etxean bezala sentitu dadin”.
Azkenik, azpiegiturak plaza zabal bat ere izango duela jakinarazi dute, “Pasaiako herri ingurunean integratuta”.
“Gipuzkoa osori mesede”
Olanoren ustez proiektuaren “garrantzia Pasaiaz harago doa eta Gipuzkoa osoari egingo dio mesede”, AdinBerrik erreferente bihurtu eta aurreratutako esperimentazio eremu bilakatzea dutelako xede. Zentzu horretan, Pasaian arrakastatsuak suertatzen diren esperientziak gerora lurralde osora hedatuko dituztela iragarri du.
Zentroaren kokapena Pasaian egotea “ez dela kasualitatea” nabarmendu du, bide batez, diputatu nagusiak: “AdinBerriren bitartez, Gipuzkoako Foru Aldundian legealdi honetan estrategikotzat ditugun bi proiektu uztartzen ditugu: gure gizarte zerbitzuak indartu eta honela gure edadetuen bizi baldintzak hobetzea, batetik, eta Pasaialdeko biziberritzean eragitea, bestetik”.
Epeak
Egutegiari dagokionean, diputatu nagusiak aurreratu du urte amaierarako proiektua idatzita izatea espero dutela, adjudikazioa egin eta obrak datorren urteko maiatzean hasteko. Lanek 36 hilabete iraungo dutela esan du Olanok, eta dena ondo bidean azpiegitura 2022. urterako zabalik egongo dela aurreikusi dutela.
Edonola ere, Olanok nabarmendu du AdinBerri “datozen hilabeteetan” hasiko dela lanean, berrikuntza unitatea uda ondoren jarriko dutelako martxan. Kokapenaren gainekoak, hala ere, ez dituzte oraindik argitu. 
