Pasaia Osorik Bizitzeko kanpainaren barruan lanketa berezi bat egiten ari dira gurasoekin, eta atzo eman zuten haren berri.
Pasaia Osorik Bizitzako kanpainan gurasoak parte hartze aktiboa izaten ari dira.
Pasaian martxan da eskola orduz kanpoko jardueretan euskararen erabilera sustatzea helburu duen Pasaia Osorik Bizitzeko kanpaina. Euskararen Aholku batzordeak antolatu du kanpaina, eta haur eta nerabeekin ez ezik, herriko elkarteekin eta gurasoekin ari dira lanean. Atzo, hain zuzen, gurasoak izaten ari diren parte hartzeaz aritu ziren Trintxerpeko alkateordetzan.
Han jakinarazi zutenez, gurasoei galdetegi bat helarazi diete, gaiaren gainean duten iritzia eman dezaten, eta galdetegi horren emaitza nagusiak ere jakinarazi zituzten. Zehaztu zutenez Pasaia-Lezo Lizeoko eta Karmengo Ama ikastetxeko 200 gurasok bete dute galdetegia, eta erantzunei erreparatuta bi ondorio nagusi nabarmendu zituzten: batetik, gurasoentzat haien seme-alaben eskola orduz kanpoko jarduerak euskaraz izatea jarduera horiek duten ordutegia eta prezioa baino garrantzitsuagoa dela, eta bestetik, gurasoen erdiak baino gehiagok aipatu dutela haien seme-alabak joaten dien elkarteei euskaraz izan daitezen eskatuko lioketela.
Baieztapen horietan oinarrituta Euskararen Aholku Batzordeak gurasoak animatu nahi ditu eskari horiek bideratzera “eskola orduz kanpoko jarduerak euskaraz izateko eskatzeak eragina izango duela” erabat sinetsita.
Euslider saioak
Baina galdetegiaz soilik ez. Hainbat gurasok martxoan eta apirilean egin dituzten
Euslider saioez ere aritu ziren alkateordetzan. Saioak dinamizatu dituen Ahize-AEK enpresako kide Mikel Urdangarinek azaldu zuenez, gurasoen eskaerak nola bideratu eta gauzatu daitezkeen aztertzen aritu dira gurasoekin, herriko aisialdi elkarteek eta kirol taldeek euskararekiko konpromisoan aurrera egiteko gurasoen eskaera ezinbestekoa dela iritzita.
Urdangarinek gaineratu zuenez, Euslider saioetan, horiez gain, eta beti ere parte hartze dinamikak erabilita, hizkuntzaren inguruko portaerak aldatzeko faktoreak landu, eta aurreiritzik indargabetu dituzte, besteak beste, gurasoei eragiteko gai direla ikusaraziz.
